Qırım ve Aqyardaki Rospotrebnadzor idaresiniñ yolbaşçısı Natalya Penkovskaya bildirgeni kibi, aprelniñ 22-sinde qayd etilgen 5 yañı koronavirus hastasından ekisi - Moskovadan kelgen adamlar.
"Eki adise - Saq ve Qırım rayonlarında - Moskovadan kelgen adamlardır. Olarnıñ keskin respirator virus infektsiyası qayd etildi ve buyruğıma köre, olar koronaviris infektsiyasına teşkerilmeli edi. Olarnı hastahanege qoydılar, yaqın alâqada olğan şahıslarnı observatorğa yolladılar", - aytıp berdi Penkovskaya.
O qayd etti ki, hastalarnıñ alâqa dairesini alâ daa tayinlene.
Daa evel Rusiye nezaretindeki Qırım başı Sergey Aksönov haber etkeni kibi, tünevin ves yañı koronavirus hastalığı adisesi qayd etildi.
Böylece, Qırımda 51 tasdıqlanğan COVID-19 adisesi bar. Aqyarda - 18.
Qırımda özüni izolâtsiya etüv rejimi aprelniñ 30-na qadar, Aqyarda ise aprelniñ 19-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
