Rusiye nezaretindeki Qırım başı Sergey Aksönov haber etkeni kibi, tünevin ves yañı koronavirus hastalığı adisesi qayd etildi.
"Bugünki al o qadar yahşı degil. Keçken 24 saatta - 5 hasta adam. Üçü evelki merkezler, ailelerinde bar edi. Bir adamnıñ endi pnevmoniyası bar edi, o Jeleznodorojnoye hastahanesinde yata edi. Ola bilir ki, Bağçasaray rayonında hastalandı. Eki adise - Saq ve Canköy rayonlarında. Onıñ içün raat olmağa daa erte", - dedi Aksönov aprelniñ 22-sinde COVID-19 ştabınıñ oturışında.
Qırım ve Aqyardaki Rospotrebnadzor idaresiniñ yolbaşçısı Natalya Penkovskaya bildirgeni kibi, yuqumlanğan adamlarnıñ alâqa dairesi 111 adamdır.
"Jeleznodorojnoye hastahanesinde koronavirus hastasınen beraber yatqan patsiyentlerni Aqmescitniñ №7 hastahanesine alıp kettiler, tıp işçilerini - observatorğa", - dedi o.
Böylece, Qırımda 51 tasdıqlanğan COVID-19 adisesi bar. Aqyarda - 18.
Qırımda özüni izolâtsiya etüv rejimi aprelniñ 30-na qadar, Aqyarda ise aprelniñ 19-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
