Qırım atiqiyatçıları (arheologları), Sarayda yapılacaq restavratsiyadan evel, mimariy kompleksniñ sekiz obyektinde qazmalarnı yapa. Bu hususta Qırım federal universitetiniñ tarihiy bölüginiñ dekanı Aleksandr Gertsen aytıp berdi, dep haber ete “RİA Novosti Krım”.
“Qazma işleri, restavratsiyanen oğraşqan leyha teşkilâtınen tizilgen añlaşmağa köre yapıla. Biz restavratsiya yapılacaq obyektlerde müendis-atiqiyat tetqiqatlarnıkeçiremiz. Bu - mimariy kompleksiniñ sekiz obyektidir”, - RİA Novostige dedi Gertsen.
Onıñ aytqanına köre, bu - leyha vesiqalarınıñ daa keyfiyetli olması içün kerek.
“Şimdi tek bir şey ayta bilem: bu kompleksniñ tarihi pek qıyın. Mında çoq tamirlevler, bozmalar ve başqadan qurmalar yapılğan”, - dedi Gertsen.
Atiqiyatçılar anda iyünniñ soñuna qadar çalışacaq.
Qırımtatar faali Edem Dudakov Büyük Han Caminiñ etrafı, Hanlar mezarlığı ve Bağçasaraydaki ahırda keçirilgen qazma işleriniñ videosını derc etti. Körüne ki, erkek ahır korpusında çuqurda çalışa, tapılğan artefaktlar ise fotoğa qayd etilmeyip bir obağa qoyula.
Ukraina Medeniyet nazirligi bu işler sebebinden Han sarayınıñ baş korpusı yıqıluv telükesi altında buluna.
Bağçasaraydaki Hanlar sarayı – qırımtatarlarnıñ tarihınen bağlı eñ meşur müzey, Qırım hanları Geraylarnıñ yaz rezidentsiyasıdır. Müzey kompleksinde saray, garem, hanlar mezarlığı ve cami bar. O, UNESCO dünya mirasınıñ cedveline kirsetilecek namzetler sırasında mevcut.
