Rusiye nezaretindeki Qırım başı Sergey Aksönov, Qırımda sakinlerniñ "yaşayışnı yahşılaştırğan" Rusiye leyhaları, Kyivde isteriya reaktsiyasına ve Avropada memnüniyetsizlikke sebep ola, dep saya.
Böyle o QMC prokuraturasınıñ Rusiyeniñ ilhaq etilgen Qırımğa poyezd yibermesi sebebinden cinaiy dava açqanını tefsir etti.
"Bellesem, bütün bu adisede eñ azından bir müsbet taraf bar: Ukraina akimiyeti köpürniñ "Mosfilm" dekoratsiyaları degil, amma kerçekten bar olmasını ve ondan kerçek poyezdler yürgenini qabul etti, olar bunı çoq vaqıt devamında red ette edi", yazdı dekabrniñ 26-sında Facebookta Aksönov.
Dekabrniñ 23-ünde Rusiye prezidenti Vladimir Putin Keriç boğazından keçken köpründe poyetlerniñ yürmesini başladı. Qırım vaqtınen qararnen saat 2:00 Sankt-Peterburgdan ilhaq etilgen Aqyarğa ketken "Tavriya" poyezdi Keriç köprüni ötti. Dekabr 25-inde saba saat 9:25 Aqyarnıñ demiryol vokzalına "Tavriya" rusiye passajir poyezdi kelip çıqtı. Dekabrniñ 26-sında Aqyar demiryol vokzalından poyezd Rusiyeniñ Sankt-Peterburg şeerine ketti.
QMC prokuraturası Keriç köpründen ilhaq etilgen Qırımğa Ukraina devlet sıñrından adamlarnıñ qanunusız keçirilmesi sebebinden cinaiy dava açtı.
Ukraina TİN Rusiye prezidenti Vladimir Putinniñ Qırımnı ziyaret etkeni ve Keriç köprüniñ demiryol qısmını açqanından sebep keskin narazılıqnı bildirdi.
Avropa Birligi Keriç köpründen demiryol naqliya areketiniñ açılmaşına Ukrainanın territorial bütünliginiñ bozması dedi.
