Qırımda endi beş adam COVID-19 sebebinden ağır alda buluna. Bu aqta Qırımnıñ Rusiye ükümeti baş nazir muavini Yelena Romanovskaya mayısnıñ 23-ünde koronavirus yuqunçına qarşı küreş operativ ştabınıñ toplaşuvında bildirdi.
"Dört hasta Aqmescit şeer hastahanesinde yata, birisi - Kezlev şeer hastahanesinde", - dedi memur.
Romanovskayanıñ aytqanına köre. tibbiy közetüv astında 1997 adam bar, olarnıñ 1060-ı evlerinde, 279-ı hastahanelerde ve 658-i observatorlarda baqıla.
Qırımda mayıs 23-ünde eki yañı koronavirus adisesi qayd etildi.
Конец самоизоляции. Как прошла первая неделя без жестких ограничений в Крыму (фотогалерея)
Qırımnıñ Rusiye akimiyeti malümatına köre, bugünge qadar 326 yañı koronavirus hastası qayd etildi, 9 koronavirus hastası vefat etti. Aqyarda 154 yañı koronavirus hastası qayd etildi, eki kişi vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
