Keriç köpründen keçken naqliyatnıñ sayısı 3 million maşnadan arttı, dep bazarertesi künü bildirdi naqliyat keçitiñ haber merkezi.
“Oktâbr 29, bazarertesi kününe dair, 2018 senesi mayıs 16-sında yol areketiniñ açılmasından başlap, yañı köpür yolundan eki tarafqa 3,033 million naqliyat keçti. Oktâbrniñ başından, kün boyu orta esapta 9,34 biñ maşna yüre”, - denile beyanatta.
Bugünge naqliyatnıñ 18% - yük maşnaları.
Oktâbr 1-inde yük naqliyatı qısmı açılğanından soñ, işğal etilgen Qırımğa taraf 24 biñge yaqın fura keçti, qomşu Rusiye tarafına ise - 22,5 biñ.
Keriç boğazındaki köpürniñ maşna qısmı mayısnıñ 16-nda yengil maşnalarğa açılğan edi. Oktâbr 1-inde yük naqlitatı yürüşi açıldı. Köpürniñ demiryol qısmı soñuna qadar daa qurulmadı.
Ukraina prezidenti Petro Poroşenko, Rusiye işğal etken Qırımda Keriç köprüniñ qanunsız qurucılığı Kreml tarafından halqara uquq bozulğanınıñ daa bir delili ola, dep aytqan edi.
Avropa Birligi ve AQŞ Rusiye ve işğal altındaki Qırım arasında Keriç köprüniñ qısmen açılışını tenqit ettiler. Ukraina tarafı, 2014 senesi Qırım işğalinden soñ Rusiye ile köpür qurucılığana dair añlaşmadan çıqqan edi.
