Qırımdaki FSB hadimleri qırımlı Reşat Medinovnı yiberdi. O, avgustnıñ 27 Qırım memuriy sıñırında tutılğan edi. Bu aqta qırımtatar faalcisi Nariman Celâl Facebookta haber etti.
Onıñ malümatına köre, Medinovnı bir qaç saat devamında Krasnoperekoposk şeeriniñ FSB idaresinde tutqanlar.
Avgustnıñ 27, bazarertesi künü, qararnen saba saat 4-te, Rusiye FSB-niñ Sıñır hızmeti Qırım memuriy sıñırını keçken 1994 senesi doğğan qırımtatar Reşat Medinovnı tutıp aldı. O Ukrainanıñ qıta qısmına kete edi.
Avgustnıñ 25-nde saba Rusiye telükesizlik hadimleri apayı ve üç balasınen Ukrainanıñ qıta qısmına qaytqan Kyiv sakini qırımtatar Server Devletşayevni Qırımdan çıqqan arada tutıp aldı. Tutılıp alınuv sebepleri belli degil. Rusiye telükesizlik organları bu malümatnı izaatlamay. Daa soñra o yiberildi.
Qırım Rusiye tarafından ilhaq etilgen soñ, 2014 senesi Ukrainanıñ qıta qısmınen yarımada arasında memuriy, amma aslında kerçek bir «sıñır» peyda oldı. Memuriy sıñırda «Kalançak», «Çaplınka» ve «Çonğar» olaraq üç kiriş-çıqış noqtası çalışıp başladı.
