Rusiye telükesizlik hızmetleri bir qaç saat tutqan soñ, apayı ve üç balasınen beraber Qırımdan Ukrainanıñ qıta qısmına qaytqan Kyiv sakini qırımtatar Server Devletşayevni qoyıp yiberdi.
Bu aqta Qırımtatar Milliy Meclisiniñ reisi Refat Çubaro vhaber etti.
“Qırımdan şimdiçik haber etkenlerine köre, FSB tarafından 18 saat devamında tutulğan Server Devletşayev bağlanıp, onı qoyıp yibergenleri aqqında haber etti. Haberniñ ailesi tarafından tasdıqlanmasını bekleycekmiz”, – dep yaza Çubarov Facebookta.
İşbu malümatnı “Qırım birdemligi” cemaat teşkilâtı da tasdıqlay.
“Gece saat 1.30da Server Devletşayevni qoyıp yibergenler ve al azırda o “Kalançak” kiriş-çıqış noqtasına doğru kelmekte”, – denilmekte haberde.
Bundan da ğayrı, diger kiriş-çıqış noqtasında, Rusiye telükesizlik hızmetleri bir qaç saat tutqan soñ, diger qırımtatar İslâm Karaşayevni de qoyıp yibergen, dep yaza teşkilât.
Avgustnıñ 25-nde saba Rusiye telükesizlik hadimleri apayı ve üç balasınen Ukrainanıñ qıta qısmına qaytqan Kyiv sakini qırımtatar Server Devletşayevni Qırımdan çıqqan arada tutıp aldı. Tutılıp alınuv sebepleri belli degil. Rusiye telükesizlik organları bu malümatnı izaatlamay.
Devletşayev ailesinen beraber Qurban bayramını qayd etmek içün avgustnıñ 19-nda Qırımğa kele.
Qırım Rusiye tarafından ilhaq etilgen soñ, 2014 senesi Ukrainanıñ qıta qısmınen yarımada arasında memuriy, amma aslında kerçek bir «sıñır» peyda oldı. Memuriy sıñırda «Kalançak», «Çaplınka» ve «Çonğar» olaraq üç kiriş-çıqış noqtası çalışıp başladı.
