Ermeni Bazarda "Qırım titanı" zavodınıñ taşlantılarından hocalıqlar zarar kördi, hususan yüzümlikler. Bunıñ aqqında Qırım.Aqiqatqa uquqqoruyıcı Abdureşit Cepparov haber etti.
"Bugün zenaatdaşımnen Ermeni Bazarda bulundıq. Pek eziyetli müit. Şeerden tezce ketmege isteysiñ. Soqaqlarda adam az, amma tereklerden tüsken yapraqlar er yerge savurılğan. Sebzeler pek zarar kördi, bundan ğayrı yüzümlikler de - yapraqları ekşilik taşlantılarından yanğan", - dep haber etti uquqqoruyıcı.
Malüm olmağan ilk madde taşlantıları avgustnıñ 23-ünden 24-üne gecesi qayd etildi. Bir gece Ermeni Bazar şeeri ve yaqın köylerde qora, ev damları, aletler ve ösümlikler üstünde yapışaq yeşil tot peyda oldı ve avada keskin ekşilik qoqusı sezile edi.
Sentâbrniñ 4-nde saba Ermeni Bazar mektepleriniñ müdirleri, birinci sınıf talebeliniñ ana-babalarına telefon etip, şeer tışına çıqacaqları aqqında haber etti. Balalarnen beraber analar da sanatoriylerge yollanılacaqları aqqında aytıldı. 2-11 sınıf talebeleri ise özleri ketmek kerek edi.
Qırımnıñ şimalinde zararlı taşlantılarnıñ kölemi normadan tış çıqtı. Qırımnıñ rusiyeli başlığı Aksönovnıñ aytqanına köre, “Qırım titanı” zavodınıñ işi eki aftağa toqtatıldı.
