Qırımtatar faali Nariman Celâl Qırım.Aqiqat Radiosınıñ efirinde Ukrainanıñ yañı baş naziri Denis Şmıgalniñ Qırımğa suv teminatı aqqında beyanatını tenqit etti ve yarımadada suv meselesi "felâketli olmağanını ayttı.
"Men Qırımda yaşayım. Vaziyet er vaqıttaki kibi. Yarımadada suv meselesi er vaqıt bar edi, amma ealige yeterli edi. Sadece bir qaç şeerde problema bar edi. Dnipro suvu ise ekseriyette köy hocalığı içün qullanıla edi - bu Qırımnın şimaliy bölgeleri, anda pirniç ve sebzelerni östüre ediler. Şimdi rusiye akimiyeti araçıqlarnı açıp, onı qullana, çünki "Qırım titanı"na çoq suv kerek, qocaman qurulışlar da çoq suv qullana. Bunıñ, nazir qasevet etken Ukraina sakinlerine kerek olğan obyektlerge iç alâqası yoq. Felâket yoq!", - dedi Celâl.
Daa evel Ukraina tış işler naziri Dmıtro Kuleba, Kyiv ilhaq etilgen Qırımğa Dnipro (Özü) suvunıñ teminatınıñ başlanması imkâniyetini muzakere etmey, dep haber etti.
Cumaaqşamı künü Ukrainanıñ yañı baş naziri Denis Şmıgal Facebook saifesinde yazdı ki, Ukraina ükümeti ilhaq etilgen Qırımnı işğalden boşatılmağance, onı suv ile temin etip olamay.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
