Aqmescit "Hizb ut-Tahrir davası" iştirakçileriniñ anası Dilâra Abdullayeva, oğulları Üzeir ve Teymur Abdullayevler mahsus blokqa oturtılğanlarını haber etti. Bunı o Facebookta yazdı.
"Oğullarımnıñ tutuluv şaraitini daa kergin yaptılar. Üzeir eñ soñ qatta mahsus blokta bir kişilik kamerada tutula, Teymurnı ise avtozaktan birden mağazdaki kartserge oturttılar. Dayanılmaz şaraitten ğayrı, olarğa qılınalar ve "bu Rostov SİZOsı olmağanını körersiñiz" dep qorquzalar", - yazdı Abdullayeva.
Abdullayevanıñ yazğanına köre, Rusiye Yuqarı mahkemesiniñ qararından soñ, oğullarına terror eylemini yapqan terrorcılarğa kibi baqıp başladılar.
"Ne yapmalı? Qabaatsız oğullarımızğa qarşı işkencelerni ne etip toqtatmalı? Bilgenim bu - susıp oturmaq mümkün degil. Balalarımız türmede olğance susmaq aqqımız yoq!", - yazdı mabüslerniñ anası.
"Hizb ut-Tahrir davası" iştirakçileriniñ tutuluv şaraitini kerginlestirilgeni nenen bağlı olğanı belli degil.
Rusiye Yuqarı mahkemesi dekabrniñ 24-nde istinaf şikâyetini baqıp, «Hizb ut-Tahrir davası» mabüsleriniñ (Aqmescitteki birinci gruppa) ükmüni deñiştirdi. Qırımlılarnıñ apis cezaları 6 ayğa eksildi.
Böylece, Uzeir Abdullayev 12 yıl ve 6 ay, Rustem İsmailov 13 yıl ve 6 ay, Emil Cemadenov 11 yıl ve 6 ay, Ayder Saledinov 11 yıl ve 6 ay apis cezasını aldı. Teymur Abdullayevniñ ükmü ğayrıdan baqılğan soñ, onı 16 yıl ve 6 ayğa üküm ettiler, onıñ içün 1 yıl ve 4 ay müddetinen memuriy nezaret belgilendi.
Ukraina Tış işler nazirligi bu davağa narazılıq bildirip, Rusiyege qarşı sanktsiyalarnı quvetleştirmege çağırğan edi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
