Ukrainadaki Rusiyeniñ tesiri sebebinden, Avropa havfsızlığı sisteması yoq etildi. Onı yañıdan tiklemek içün, Qırımnı Ukraina nezareti altına qaytarmaq ve devletniñ şarqında olıp keçken cenkni toqtatmaq kerek. Bunıñ aqqında Frenkistanda Ukraina elçisi Oleg Şamşur “Ukrinform”-ğa ayttı.
“Rusiye tecavuzı neticesinde Avropa havfsızlığı sisteması bozulmadı, o - yoq etildi. Yañı havsızlıq sistemasını qurmaq içün mıtlaqa Qırımnı işğalden qorçalamaq, Rusiye devletimizge qarşı açqan cenkni toqtatmaq kerek”, - dedi diplomat.
Şamşur Avropa havfsızlığınıñ tiklenmesini doğrudan Qırım yarımadasını işğalden qorçalavınen bağlay.
“Bozulmaz sıñırlar aqqında Helsinki aktı (avgust 1, 1975 senesi) neticesinde peyda olğan añlaşma Rusiye tecavuzınen bozuldı. Qırımda Rusiyeniñ işğali ükümsürgence, Avropa turğunlığınıñ yañıdan tiklenüvi iç ciddiy muzakere etilip olamaz”, - dep qayd etti o.
Parijdeki Ukrain elçiligi başınıñ fikrine köre, ilk “işaret” - 10 yıl evel Gürcistanğa qarşı Rusiye tecavuzı edi.
“Şübesiz, “ilk işaret” - Gürcistanğa qarşı tecavuz edi. Qırımnen, qıta Ukrainanen olğan şeyler - işaret degil, bu endi “telüke düdügi” - dedi diplomat.
Halqara cemaatçılıq Qırımnıñ işğali ve ilhaqını qanunsız dep tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
