Fevqulâde vaziyetiniñ red etüvinden soñ balalarnıñ qaytarmaq Kreml nezareti altındaki Qırım akimiyetiniñ qararı - aceledir. Böyle fikirni Qırım.Aqiqat Radiosı efirinde Qırım ekilogı Margarita Litvinenko ifade etti.
“Aqılcasına - bunı yapmaq mümkün degil. Çünki balalar, aslında, evel olğan şaraitke kene qayta. Ana-babalar balaları içün nafile qasevet etmeyler. Tek resmiy satlarğa baqsañ, kimerleri zararlı maddeler kölemi sıfırğa yaqın dep yaza. Amma yerli sakinler, çeşir-türlü vesiqalarnıñ kopiyalarını kösterip, norma 18 kere yüksetilgenini qayd ete”, - dey Litvinenko.
Ekolognıñ fikrince, Qırım akimiyeti balalarnı ne yapmağa bilmegeninden böyle iş kördi.
“Balalarnı ne yapmaq? Olarnı daima sanatoriylerde tutıp olamazlar. Zavod da çalışacaq. Rusiyede bu yekâne (titan dioksidini işletip çıqarğan - QA) şirket, Qırım şirketi olsa da. Elbette ki, o çalışacaq”, - dep qoştı o.
Qırım şimalinde zararlı taşlantılar aqqanda daa çoq malümat Qırım.Aqiqat saytında tapa bilesiñiz.
Sentâbr 23-yünde yerli sakinler, fevqulâde vaziyetiniñ red etüvinden soñ şeerge balalar qaytarılıp başlağanı içün içtimaiy ağlarda haber etti.
Avgustnıñ 23-nden 24-ne keçer gecesi Ermeni Bazarda zararlı himiyeviy taşlantı atılğanı qayd etildi. Qırım memuriyeti, zararlı maddeler avağa atıluv sebebi - sıcaqtan ve uzun müddet yağış olmağanıdan, “Qırım titanı” qullanğan ekşilik havzularından çıqqan buvlanuvı dep iddia ete.
Faqat Kyiv, Qırımda himiyeviy taşlantılarnıñ avağa atılmasına Rusiye arbiyleri sebepçi olğan dep iddia ete, çünki olar idman yapqanda titan ve soda zavodlarınıñ taşlantılarına ateş açqan emiş.
Qırımnıñ rusiyeli başlığı Sergey Aksönov, Ermeni Bazardan (Armânsk) mektep çağına yetmegen ve mektep çağındaki balalarnı avanıñ bulaşuvı içün Qırım sanatoriylarına yollacaqları aqqında haber etti.
“Qırım titanı” zavodı daa 1971 senesi işinibaşladı, 2000 senelerniñ başında ise, Dmıtro Firtaşnıñ Groop DF şirketiniñ nezareti altına keçti. İşhaneniñ esas yönelişi - titan dioksidiniñ istisalı. Titan dioksidi - lak, boya, rezina, plastmassa işlep çıqaruvında ve daa çoq başqa saalarda qullanılğan madde.
2014 senesi, Qırım işğalinden soñ, Dmitriy Firtaş, zavod idare etilmesiniñ terkibini deñiştirdi. Oktâbr ayında Groop DF, “Qırım titanı” şahsiy aktsiyalı şirketini (ŞAŞ) “Titan yatırımları” açıq aktsiyalı şirketine (AAŞ) berdi. 2015 senesi “Qırım titanı” ŞAŞı “Ukrainian Chemical Products” adını deñiştirdi.
