Rusiye Ğarp memleketerine qarşı tecavuziy siyasetini devam ete, dep bildirdi Estoniya Mudafaa naziri Kalle Laanet. Bunı ERR portalı haber ete.
Onıñ sözlerine köre, 2008 ve 2014 seneleri Rusiyeniñ arbiy talimleri Gürcistan ve Ukrainada tecavuz sebebi olğan.
«Sentâbr ayında ötkerilecek Garp-2021 strategik talimler daa bir kere Rusiyeniñ kerçek arbiy planlarını köstere», – dep sayaya Laanet.
Qırımnıñ Rusiye tarafından işğal etilmesi aqqıyeda aytıp, Rusiye prezidenti Vladimir Putinniñ «yañı muvafaqiyet ikâyesine» ihtiyacı bar, dep ayttı.
«Mevcut vaziyette memleketlerniñ ekseriyeti kibi Rusiye de iqtisadiy qıyınlıqlarğa rastkele, amma arbiy qudreti ve uruşqa qabiliyeti ve tış ambitsiyaları Moskvanıñ esas prioriteti edi ve qalacaq. Qırımnıñ qanunsız işğalinden yedi yıl keçti ve Putinniñ yañı muvafaqiyet ikâyesine», – dedi nazir.
Amerikanıñ Devlet kâtibi Entoni Blinken, ABD Rusiyeni Qırımnıñ işğalini toqtatmağa çağırğanını bildirdi.
Fevralniñ 26-nda cemaatçılıqnıñ teşebbüsi ile «Qırımnıñ Rusiye işğaline qarşı tirenüv künü» qayd etile. 2014 senesi fevralniñ 26-nda Qırım Muhtar Cumhuriyetiniñ Yuqarı Şurası ögünde Ukraina topraq bütünligine qoltutuv mitingi olıp keçken edi. Miting iştirakçilerine qarşı Rusiye tarafdarları, hususan «Rus birligi» firqası çıqtı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
