Rusiye nezareti altındaki Aqmescit Kiyev rayonı mahkemesinde, Qırım advokatı Emil Kürbedinovnıñ davası boyunca mahkeme oturışını dekabr 7, cuma kününe keçirdiler, oturış saat 9:30 başlana dep bildire Qırım.Aqiqat muhbiri.
Dekabr 6-sında keçirilgen oturışta eki şaatnı ve memuriy protokolnı tizgen şahısnı sorğuğa çektiler. Şaat Sergey Dremov, tehnika mütehassısı, yazını qullanıcınıñ özü ya da o saifeniñ login ve paroli olğan adam derc etkenini tasdıqladı. Mahkeme, şaatqa bütün suallerni soramağa imkân bermeyip, onıñ sorğusını toqtattı.
Sumı şeerinden şaat Vladislav Strelçenko mahemede, divarında “qaranen beyaz bayraqlar” olğan saifeniñ baqıluvınıñ şaatı olğanını söyledi. İleride sorğu devamında, o saife baqıluvını yalıñız özü yapqanı bilindi, bu ise qanun köre protseduranı boza. Mahkemeci şaattan kerekli malümat almağa tırıştı. Soñra, mudafaa ve mahkemelengenniñ suallerini diñlep bitirmeyip, şaatnı yiberdi.
Dava şaatı Ruslan Şambazov, mahkemede onıñ “içtimaiy ağlarda ekstremist malümatını qırırmaq içün şahsiy know-how bar olğanını” beyan etti.
Bundan soñ mahkeme alternativ ekspertizanıñ keçürivini kene red etti ve IP aqqında vaziyetni açıqlamaq icün, dava malümatında belgilengen Luğansk vilâyetinden mütehassısnı çağırtmaqtan vazğeçti.
Mahkeme Kürbedinovnıñ şahsiy şeylerini - iphone, macbook ve 1 terabaytlı hatıra diski - qaytarmaqnı red etti, çünki olar “memuriy qanun bozuvınıñ aletleri ola bile”. Kürbedinov, bunıñ mantıqasız olğanını iddia etti, çünki 2013 senesi, o yazı yapılğanda, ne iphone, ne de macbooknıñ bu modelleri daa olmadı.
Advokat Edem Semedlâyev, elektron taşıyıcılardaki advokat sırı aqqını qorumaq içün, advokatlar palatasınıñ vekilini celp etmege talap etti. Mahkeme bunı red etti.
Dekabr 6-sında Rusiyeniñ ekstremizm ile küreş merkeziniñ hadimleri advokat Emil Kürbedinovnı tutıp aldı. Onı Rusiyeniñ memuriy uquq bozuvları aqqında kodeksiniñ 20.3 maddesine köre ((natsist işaretleri ya da timsalleri, ekstremist teşkilâtlarnıñ işaretleri ya da timsalleri, ya da federal qanunlarnen yasaqlanğan işaret ve timsalleriniñ teşviqatı ve açıq numayış etilmesi) qabaatlaylar.
Advokatqa 2013 senesi Facebookta derc etilgen yazı içün memuriy tevfiq mahküm etile bile. Kürbedinovğa çaquvnı şimdi Dimaşqta yaşağan sabıq Qırım sakini yazdı.
Qırımda Rusiye İçki İşler Nazirliginiñ idaresi bu malümatnı tefsir etmey.
Rusiyeniñ Ekstremizm ile küreş merkeziniñ hadimleri ve üyken prokuror Valentin Çuprina Emil Kürbedinovnı ekstremizm ve terrorizm qanunları bozulamaz, dep tenbiyelegen edi.
İşğalden soñ Qırımdaki Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
