Qırımda rusiye quvetçileri tutıp alğan advokat Emil Kürbedinovğa Facebook yazısı içün memuriy tevfiq mahküm etile bile. Bu aqta Qırım.Aqiqatqa Qırım imayecisi Lilâ Gemeci aytıp berdi.
“Şimdi o (Kürbedinov - QA) Ekstremizmge qarşılıq köstergen Merkezde buluna. Onı Rusiyeniñ memuriy uquq bozuvları aqqında kodeksiniñ 20.3 maddesine köre (natsist işaretleri ya da timsalleri, ekstremist teşkilâtlarnıñ işaretleri ya da timsalleri, ya da federal qanunlarnen yasaqlanğan işaret ve timsalleriniñ teşviqatı ve açıq numayış etilmesi) memuriy uquq bozuv davası açıla. Onen beraber advokat Edem Semedlâyev buluna. Bundan ğayrı, Qırım advokatlar palatası, anda baracak daa bir advokatqa ruhset imzalay. Emilni, 2013 senesi Facebookta derc etilgen yazı içün qabaatlaylar. Qaysı bir yazı olğanını biz şimdi aytıp olamaymız. Biz şimdi dava malümatınıñ ögrenüv seviyesindemiz” - dep aytıp berdi Gemeci.
Onıñ aytqanına köre, Kürbedinovğa memuriy tevfiq mahküm etile bile.
“Bu maddeniñ cezası - memuriy tevfiq. Dava malümatı mahkemege tüşse ve işniñ mahsus sımarlanğanını közde tutsaq, neticesi belli. Ceza, memuriy tevfiq sıfatında olacağınıñ büyük ihtimalı bar”, - dep qoştı o.
Dekabrniñ 6-nda Qırımda Rusiyeniñ Ekstremizm ile küreş merkeziniñ hadimleri advokat Emil Kürbedinovnı tutıp aldı.
Qırımda Rusiye İçki İşler Nazirliginiñ idaresi bu malümatnı tefsir etmey.
Rusiyeniñ Ekstremizm ile küreş merkeziniñ hadimleri ve üyken prokuror Valentin Çuprina Emil Kürbedinovnı ekstremizm ve terrorizm qanunları bozulamaz, dep tenbiyelegen edi.
Oktâbrniñ 27-nde Aqmescitte «Qırım birdemligi»niñ toplaşuvında Rusiye prokuraturasınıñ hadimleri, kimligi belli olmağan maskalı insanlar ve politsiya hadimleri keldi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
