Kreml nezareti altındaki Aqmescit Yuqarı mahkemesi istinaf şikâyetni red etti ve faalci Marlen Mustafayevni tevfiqte qaldırdı dep haber ete Qırım.Aqiqat mühbiri.
Bundan ğayrı, Mustafayevni mahkeme zalına ketirmediler.
“Marlenge telefonnı qaytarmaq kerek olğanınen mahkeme razı olmadı. Bütün şefaatlarnıda boş ve delilsiz sayıp red etti. Bundan ğayrı, Marlenni mahkeme binasına ketirmediler, bunı da aq-uquq bozulması kibi qabul etem”, - dedi imayeci Nazim Şeyhmambetov.
Sentâbrniñ 4-ünde Kreml nezareti altındaki Aqmescit Yuqarı mahkemesi Marlen Mustafayevni 12 künge tevqif etti.
Aqmescit rayonınıñ Kamenka qasabasında sentâbrniñ 4-nde saba faal Marlen Mustafayevniñ evinde tintüv yapıldı.
2017 senesi fevral ayında Marlen Mustafayevniñ evinde, “ekstremist timsaller”niñ numayış etilmesi sebebinden tintüv keçirilgen edi. Telükesizlik hadimleri Mustafayevniñ kompyüter ve bir qaç kitabını aldı.
Mustafayevge qol tutmağa on adam keldi, olar olıp keçken vaqialarnıñ videosını çekip, içtimaiy ağlarda yayınladı. O adamlarnıñ episi keççe yaqalanğan edi.
Daa soñra Mustafayev, “ekstremist teşkilâtlarnıñ timsalleriniñ numayışı ya da propagandası”nda qabaatlanıp 11 künge tevqif etildi, safdaşları ise - 5 künge. Faal 2017 senesi martnıñ 4-nde azat etildi.
Qırım ilhaqından soñ yarımadada rusiyeli akimiyet mustaqil jurnalistler, cemaat ve qırımtatar Milliy areketiniñ faalleri, qırımtatar Milliy Meclisiniñ azaları ve Rusiyede yasaqlanğan “Hizb ut-Tahrir” ile alâqası olğanında şeklengen musulmanlarnıñ evlerinde sıq-sıq tintüvler keçirip başladı.
