Ukrainada ABD ordusı peyda olğan ya da qomşu memleketlerde NATO quvetleri artqan taqdirde Rusiye «qoşma tedbirler körecek». Bunı aprelniñ 2-nde jurnalistlerge Kremlniñ matbuat kâtibi Dmitriy Peskov bildirdi, dep haber ete «İnterfaks».
«Şübesiz ki, stsenariyniñ böyle inkişafı Rusiye sıñırları yaqınlarında kerginlikniñ daa da artmasına sebep olur edi. Elbette, bu, telükesizlikni temin etmek içün Rusiye tarafından qoşma tedbirlerni talap ete», – dedi Peskov.
O, angi bir tedbirler aqqında söz ketkenini aytmadı.
Aynı zamanda, Peskov, Rusiye tarafından Ukraina ya da diger qomşu memleketler içün telüke bar olğanını red ete.
«Rusiye iç kimseni tehdit etmedi. İç bir vaqıt kimseni tehdit etmedi. Ve bu bizim mevamımızdır», – dedi Peskov.
Böyle etip, Peskov ABD Mudafaa naziri Lloyd Ostinniñ, Rusiye tecavuzı kerginleşken taqdirde Birleşken Devletler Ukrainağa qoltutmağa azır olğanı aqqında lafına cevap berdi.
Ukraina Tış işler naziri Dmıtro Kuleba, «Rusiyeniñ vaziyetni kerginleştirüvi soñki yıllarda eñ büyük ola», dep bildirdi. Onıñ qayd etkenine köre, «Rusiye Federatsiyası ateşsiz rejimge sadıq olğanını isbatlamağa istemeyip», Donetsk ve Lugansk vilâyetlerinde ve Qırımda vaziyetni muntazam sürette kerginleştire.
Budan ğayrı o, OSCE baş kâtibi Helga Schmid telefonda laf etip, «Rusiye, Donetsk ve Lugansk vilâyetlerinde ve Qırımda telükesizlik vaziyetini muntazam sürette kerginleştire», dep haber etti.
Bu afta Ukraina Silâlı Quvetleri Baş ştabınıñ yolbaşçısı Ruslan Homçak bildirdi ki, martnıñ başında Novorossiysk ve Stavropolden işğal etilgen Qırımğa talimler içün avuştırılğan Rusiye ordusı yarımadada qalmağa devam ete.
Onıñ qayd etkenine köre, Rusiye Ukraina sıñırına ordusını çeke.
Ukraina Silâlı quvetleri Arbiy deñiz küçleriniñ komandanı Oleksiy Neijpapa, yedi yıl devam etken Qırım işğali vaqtında Rusiye Qara deñiz flotunıñ gemi ve suvastı gemi erkânı 45% arttı, dep bildirdi.
Mart ayında yarımadada Rusiye arbiyleriniñ muntazam talimleri keçirildi. Rusiye Mudafaa nazirligi martnıñ 16-nda Qırımda Opuk poligonında başlağan Ava desant ordularınıñ taqım ştab talimleri aqqında bildirgen edi.
2014 senesinde Qırım ilhaq etilgen soñ Rusiye yarımadada muntazam surette arbiy talimlerni yaptıra. Ukrainanıñ Baş ştabında, Rusiyeniñ Qırımdaki areketlerine qanunsız deyler.
2018 senesi yanvar ayında Fiolent burnunda S-400 Rusiye uçaqquvar-raketa kompleksleri arbiy nevbetçilikke başladı. Sentâbr ayında bunıñ kibi kompleksler Kezlevde de yerleştirildi. 2018 senesi noyabrniñ soñunda Canköyde S-400 uçaqquvar-raketa kompleksiniñ dörtünci divizionı arbiy nevbetçilikke başladı.
