Kreml kontrolindeki Bağçasaray rayon polisi «terror faaliyetine çağıruv» davası boyunca 2,5 yıl yaşav tarzı koloniyasında qalğan qırımlı vatandaş jurnalisti Nariman Memedeminovnı memuriy nezaret altına alınmağanını şikâyet etecek.
Bu aqta «Qırım birdemligi» cemaat birleşmesi Qırım.Aqiqatqa bildirdi.
«Çıqarılğan qarar devlet ve cemaat menfaatlarını qorumaq maqsadınen Rusiye Federatsiyası iç işler organlarına Memedeminov Nariman İbraimoviçni qarşı şahsiy profilaktika tesiri altına almağa imkân bermeycek», – dep bildire birleşme Bağçasaray rayonındaki Rusiye İç işler nazirligi bölüginiñ yolbaşçısı polis mayorı Aleksandr Şumeyevniñ Yuqarı mahkemege bergen muracaatını.
Rusiye kontrolindeki Qırımnıñ Bağçasaray rayon mahkemesi Qırımdaki Rusiye İç işler nazirliginiñ yerli bölüginiñ daa evel Rusiyede «terrorizmge açıq çağırğanı» içün mahküm etilgen ve 2,5 yıl yaşav tarzı koloniyasında bulunğan vatandaş jurnalisti Nariman Memedeminovnı memuriy nezaret altına almaq talabını red etti.
Bağçasaray rayonındaki Rusiye polisi Nariman Memedeminov içün bir sıra yasaq çıqarmağa talap etken edi. Areket serbestligi sıñırlanacaq ve onı «ayda eki kere uququ qoruyıcı organlarını ziyaret etmege» mecbur etecek ediler.
Memedeminov bunı «basqı ve taqip» dep adlandırdı.
