Rusiye quvetçileri Qırımda «gaz borusında diversiya yapqanından» şübheli sayılıp apiske alınğan qırımtatar faali Nariman Celâlğa qarşı qabaatlavnı sertleştirildi. Bunı advokat Nikolay Polozov Facebook saifesinde bildirdi.
Polozovnıñ aytqanına köre, Celâl 12 yıldan 20 yılğa qadar apis cezasına mahküm etile bile.
«Tahqiqatnıñ malümatına köre, o "diversiya yapuv" ile qabaatlana ve 12 yıldan 20 yılğa qadar apis cezasına mahküm etile bile. Ve "teşkil etilgen şahıslar gruppası ve bir insan gruppası tarafından patlayıcı maddelerniñ alınması, saqlanması" içün 10 yıldan 15 yılğa qadar apis cezasına mahküm etile bile», – dep yazıla bildirmede.
Polozovnıñ qayd etkenine köre, Nariman Celâl qabaatını tanımay ve qoşma sorğuda şaatlıq etmekten red etken.
«Nariman Celâlnıñ sağlıq alı yahşı. Tutuv şaraiti de normal. Er keske destek içün minnetdarlıq bildire» – dep qoştı advokat.
Evel Rusiye FSBsi yarımadada tutulğan qırımtatar faali Nariman Celâlnıñ davasını ğayrıdan tasnif etip, qabaatlavnı deñiştirdi ve onı yardım etüv yerine diversiya yapqanında qabaatladı.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
