Rusiye kontrolindeki Qırım Yuqarı mahkemesi qırımtatar siyasetçisi ve faali Nariman Celâlnıñ apiste qaluv müddetiniñ uzatıluvına qarşı istinaf şikâyetini red etip, evelki mahkeme qurulışınıñ qararını deñiştirmedi, dep haber ete advokat Nikolay Polozov Facebook saifesinde.
«İmaye, birinci mahkeme yapqan ciddiy qanun bozuvlarını tafsilâtlıca qayd etti, şu sebepten şikâyet etilgen qararlar lâğu etilmeli edi. Nariman mahkemege cinaiy taqip etilüviniñ siyasiy sebepleri aqqında hatırlattı. Reis qadı Karavayev K.N. mesleat odasında tahminen 5 daqqa keçirip, bir şey deñiştirmemege qarar aldı. Böylece, Nariman eñ az yanvarniñ 23-ne qadar apiste qalacaq», – dep yazdı Polozov.
Advokat, imaye Qırım Yuqarı mahkemesiniñ bugünki qararını temyiz qurulışında ileride Avropa insan aqları mahkemesine muracaat ete bilmek içün de şikâyet etecek, dep qoştı.
Noyabrniñ 8-nde Celâl patlayıcı cihaznıñ qaçaqçılığında da qabaatlandı. Oktâbrniñ 28-nde faalniñ SİZOda qaluv müddeti 2022 senesi yanvarniñ 23-ne qadar uzatıldı.
Celâl insanlarnı oña ve Anğaradaki «gaz borusında diversiya» davasınıñ daa eki mabüsi Aziz ve Asan Ahtemovlarğa mektüp yazmağa çağıra.
