Ukraina Yuqarı Radasınıñ «Ses» («Ğolos») fraktsiyası deputatı Rustem Umerov diger deputatlarnen beraber (30-dan çoq) qırımtatar siyasetçisi ve faali Nariman Celâl ve diger qırımtatarlarnıñ Rusiye quvetçileriniñ tutuluvınen bağlı beyanatnıñ qarar leyhasını qayd ettiler, dep bildirdi.
«Qırımdaki işğalci akimiyet Ukraina vatandaşlarına, eñ çoq da qırımtatarlarğa qarşı basqılarnı kene quvetleştire», – dep qayd etti Umerov.
Onıñ malümatına köre, beyanatta Yuqarı Rada deputatları:
- Sentâbrniñ 3-4-nde Qırımnıñ tamır halqı olğan qırımtatarlarnıñ evlerinde keçirilgen qanunsız tintüvler, tutıp esir etüv ve apiske aluvlarnı takbih ete;
- İşğalci devlet olğan Rusiyeden halqara gumanitar uquq qaidelerine köre vazifelerini yapmasını talap ete: tamır qırımtatar halqınıñ taqip etilüvini toqtatıp, Eldar Odamanov, Aziz Ahtemov, Asan Ahtemov, Şevket Useinov, Nariman Celâl ve qırımtatar halqınıñ diger vekillerini acele azat etmesini talap ete, dep aytıla.
«Qayd etemiz ki, qırımlılarnıñ tsinik ve qanunsız bir şekilde tutuluvı – «Qırım platformasında» iştirak etüv içün ceza. Çetel devletleriniñ milliy ükümetleri ve parlamentleri, halqara teşkilâtlarğa ve parlament assambleyalarına muracaat etip, yañı basqı dalğasını takbih etmelerine çağıramız», – dep bildirdi beyanatnıñ mündericesini Umerov.
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olarnıñ arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Advokat Ayder Azamatovnıñ Qırım.Aqiqatqa bildirgenine köre, Aqmescitteki mahkeme Qırımda raatlıq künleri Rusiye quvetçileriniñ tintüvleri vaqtında tutulğan Şevket UseinovveEldar Odamanovnı sentâbrniñ 6-nda Rusiye Memuriy uquq bozuluvları kodeksiniñ 19.3 maddesine istinaden (polis, arbiy, FSB organları hadiminiñ qanuniy emrine riayet etmeme) 14 ve 15 künge apiske aldı.
Ukraina Tış işler naziriniñ birinci muavini Emine Ceppar Rusiye akimiyeti raatlıq künleri tutulğan beş insannı Aqmescit civarındaki Anğara (Perevalnoye) köyü yaqınlarında gaz borusında olğan diversiyanen bağlay, dep bildirdi. Amma gaz borusında bir şey oldımı belli degil, «başqa menbalar gaz hattı zarar körgenini tasdıqlap olamadı».
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Qırım Aqiqat, Ukraina Mudafaa Nazirliginiñ Baş istihbarat idaresine tefsir içün muracaat etti. Müessise, FSB beyanatlarınen bağlı malümat daa bermedi.
