Qırımtatar siyasetçisi ve faali, Qırımtatar Milliy Meclisi reisiniñ birinci muavini Nariman Celâl Ukraina Yuqarı Radasınıñ deputatlarını siyasiy mabüsler aqqında qanun leyhasını mümkün qadar tez qabul etmege çağırdı. Bunıñ aqqında o advokat Nikolay Polozovnıñ dekabrniñ 23-nde yayınlağan mektüpte yazdı.
«Qırımnıñ Rusiye tarafından işğaliniñ sekinci yılı. Yaqınlarda apishanede körüşkenim Vladislav Yesipenko; esassız terrorcılıqnen qabaatlanğan Raif Fevziyev; inskencelerge oğratılğa Asan Ahtemov... Er bir siyasiy mabüs öz ve umumiy azatlığımız oğrunda kereşini devam ete. Elbette, Ukraina Yuqarı Radasınıñ siyasiy mabüslernen bağlı qanun leyhası izerinde işke başlağanını bilmek bizni sevindire. Millet vekillerini bu veçiqanı mümkün qadar tez azırlamaq ve qabul etmege çağıram», – dep yazdı Celâl.
Siyasetçi, qanun leyhasınıñ azırlanmasına alâqası olğan er kesni ve ayrıca Ukraina prezidenti Volodımır Zelenskıyge minnetdarlıq bildirdi.
Ukraina Yuqarı Radası birinci muzakeresinden soñ Ukrainağa qarşı istilâdan zarar körgen siyasiy mabüsler ve qorantalarını içtimaiy ve uquqiy qoruv aqqında №6104 qanun leyhasına qabul etti. Vesiqağa 328 millet vekili qolututtı.
Ukrainağa qarşı istilâdan zarar körgen siyasiy mabüsler ve qorantalarını içtimaiy ve uquqiy qoruv aqqında üç qanun leyhası Yuqarı Radağa berildi. Teşebbüsçisi Ukraina prezidenti Volodımır Zelenskıy olğan №6104, 6105 ve 6106 qanun leyhalarınıñ metinleri Ukraina Yuqarı Radasınıñ saytında derc etildi.
Halq deputatı Rustem Umerovnıñ bildirgenine köre, №6104 qanun leyhası «Ukrainağa qarşı silâlı zıddiyet neticesinde azatlıqtan marum etilgen şahıs statusını aluv mehanizmini qolaylaştırmağa ve siyasiy mabüs ve qoranta azalarınıñ qoşma içtimaiy ve uquqiy kefaletlerini kirsetmege» teklif ete.
Ukraina prezidenti Volodmır Zelenskıy, Türkiye Kyivniñ azat etmege tırışqan siyasiy mabüslerniñ cedvelini Rusiye tarafına bergenini bildirdi.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
