Kyivdeki Ukraina buhran mediamerkezinde fevralniñ 15-nde saat 12:00-da «Qırımdan bir ses. Nariman Celâl» vesiqalı filmi leyhası taqdim etilecek.
Bu leyhanı film çıqaruv ğayesiniñ müellifleri – jurnalist Natalâ Gumenük ve Cemaat menfaatları jurnalistikasınıñ laboratoriyasından rejisser Anna Tsıgima «KrımSOS» aq qorçalayıcı teşkilâtınen beraber taqdim eteler.
«Sanat vastasınen insanlarnıñ ikâyelerini köstermek, işğal etilgen Qırımda qırımtatarlarnıñ aqları nasıl bozulğanını ve çeşit faaller olarnı nasıl qorçalamağa tırışqanını tarif etmek daa qolaydır. Nariman – qaramanlardan biridir, ve insanlar onı bilmeli», – dep tarif ete Denis Savçenko, «KrımSOS» idaresiniñ reisi.
Rejisser Anna Tsıgima Gumenüknen beraber üç levha üzerinde çalıştı. Olar işğaldeki şaraitler, siyasiy mabüsler Oleg Sentsov ve Oleksandr Kolçenko ve qırımtatarlarnıñ sürgünlikten qaytmasınen bağlı edi.
Ukraina Nazirler şurası Ukraina prezidenti Volodımır Zelenskıynıñ Qırımda «gaz borusındaki diversiya» qabaatlavı boyunca apiske alınğan qırımtatar siyasetçisi ve faali Nariman Celâlğa Levko Lukyanenko devlet stipendiyasınıñ berilüvi aqqında buyruğını tasdıqladı.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
