Aqmescit rayonınıñ Livadki (Levadki) köyünde Qırımda avgustnıñ 23-nde «gaz borusında diversiya yapqanından şübheli sayılğan» ve 60 künge apiske alınğan Asan Ahtemov kiralağan evde tintüv keçirile.
Bu aqta qırımtatar faalleri Lutfiye Zudiyeva ve Elmaz Akimova Facebookta bildirdi.
«Soy-soplarınıñ aytqanına köre, Levadki köyünde Ahtemov Asan kiralağan ve sentâbrniñ 3-nden 4-ne keçer gecesi tintüv keçirilgen evde ve azbarda uquq qoruyıcı organları kene «çalışa». Şimdi anda qorantadan kimse yoq, tahqiqat tedbirleri keçirile, amma tutulğannıñ tuvğanları iştirak etmey. Ömür arqadaşı Repika Ahtemova tintüvden soñ bu adreste vaqtınca yaşamay. Hadimler azbarlarına nasıl kirdi, bilmey», – dep ayttı Zudiyeva.
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olarnıñ arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Bundan ğayrı, Rusiye polisi sentâbrniñ 4-nde Rusiye FSBsiniñ binası ögünde tutulğan qırımtatarlarğa qarşı 58 memuriy protokol tizdi.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Qırım Aqiqat, Ukraina Mudafaa Nazirliginiñ Baş istihbarat idaresine tefsir içün muracaat etti. Müessise, FSB beyanatlarınen bağlı malümat daa bermedi.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina Tış işler naziri Dmıtro Kuleba sentâbrniñ 6-nda Ukrainanı ziyaret etken Amerika kongressmenlerine Qırımda keçirilgen yañı tintüv ve tutuvlar aqqında tarif etip, olarnı yarımadada basqılarnı toqtatmaq maqsadınen Kremlge qarşı basqı quvetleştirüvde yardım etmelerine çağırdı.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletkemuracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
