Sentâbrniñ 27-nde advokat Nikolay Polozov Facebook saifesinde Aqmescitte tevqif etilgen qırımtatar faali Nariman Celâlnıñ mektüplerini yayınladı. Mektüplerniñ birinde Celâl apisniñ "esas imtianları" aqqında yaza, digerinde destek ve yardım içün minnetdardıq bildire.
«Qırımda Rusiye işğal organları tarafından aqsız, müthiş ve tamamınen esassız taqipleriniñ qurbanı olğan bir şahıs içün esas imtianlardan biri tahqiqt vaqtında bütün yalan qabaatlarnı, delillerni, gizli şaatlarnıñ şaatlığını körmek, eşitmek ve oqumaqtır. Bu, insanğa büyük bir psihologik yüktir, içindeki duyğular furtunasına sebep ola», – dep yazdı Celâl.
Faalniñ qayd etkenine köre, böyle vaziyette "siziñ kibi vaziyetniñ bütün saçmalağını añlağan ve yardım etmege tırışqan insanlarnıñ destegini duymağa pek müimdir". O, Ukraina prezidentine BMT BA çıqışı içün minnetdarlıq bildirdi. Bu çıqta Volodımır Zelenskıy Celâlnıñ davası aqqında da ayttı.
«Bu qadar yüksek destek ve taqdirimde iştirak içün prezidentke minnetdarım. Prezidentniñ Ukraina topraq bütünliginiñ ğayrıdan tiklenilmesi, insan aqlarınıñ ve qırımtatar halqınıñ yahşı kelecegi oğrunda küreşmege devam etken biñlernen azat insanlarnıñ ve semetdeşlerimniñ fikrini ve destegini bildirgenini añlayım. Bu ilhamlandıra, areket etmek içün küç yebere» – dep yazdı o.
O, Türkiye prezidenti Recep Tayip Erdoğannıñ iştiragi ile Qırımtatar Milliy Meclis reisiniñ muavinleri Ahtem Çiygoz ve İlmi Ümerovnıñ azat etilmesini hatırlattı ve Ukraina topraq bütünligi ve suverenitetine nisbeten munasebeti içün minnetdarlıq bildirdi.
Aqmescitte tevqif etilgen qırımtatar faali Nariman Celâl SİZO-nıñ mahsus blokunda tutula. Anda o atta diger mabüslerden uzaqlaştırılğan. Bunı Celâlnıñ advokatı Nikolay Polozov haber etti.
Aqmescit civarındaki "gaz borusında diversiya yapqanından" şübheli sayılıp apiske alınğan üç mabüsniñ arasında en yaramay şaraitte qırımtatar faali Narimal Celâltutula, dep haber ete advokat Safiye Şabanova.
Rusiye quvetçileri Qırımda «gaz borusında diversiya yapqanından» şübheli sayılıp apiske alınğan qırımtatar faali Nariman Celâlğa qarşı qabaatlavnı sertleştirildi.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
