Rusiye tarafından mahküm etilgen Qırımtatar Milliy Meclisiniñ reis muavini Nariman Celâl Çeh Cumhuriyetiniñ «Başı belâda insan» aq qorçalayıcı teşkilâtı bergen «Adaletsizlik ikâyesi» aq qorçalayıcı mukâfatınıñ laureatı oldı.
Bu aqta Qırımtatar Milliy Meclisiniñ reisi Refat Çubarov bildirdi.
«Rusiye zaptçıları 17 yılğa üküm etken ve Sibirge yollanğan Celâlnıñ tuvğanları istegeni kibi, «Başı belâda insan» aq qorçalayıcı teşkilâtınıñ müdiri Şimon Panek ve Çeh Cumhuriyetiniñ Tış işler naziri Yan Lipovskiy bergen mukâfatnı advokat Nikolay Polozov aldı», – dep yazdı Çubarov Facebook saifesinde.
Mukâfat Mecliste laureatnı bekleycek.
Çubarov Celâlğa minnetdarlıq bildirdi: «Vatanımız Qırımnıñ Rusiye işğalcilerinden qurtarıluvı ve Kreml mabüsi olğan bütün vatandaşlarımıznıñ azat etilüvi içün ğayret kösteremiz».
2022 senesi sentâbrniñ 21-nde Rusiye kontrolindeki Qırımnıñ Yuqarı mahkemesi Nariman Celâlnı 17 yıl sert rejimli koloniyada qalmasına üküm etti. Bundan ğayrı, 700 biñ ruble para cezası berildi ve azatlığı 1,5 yılğa sıñırlandı.
Asan Ahtemov 15 yıl sert rejimli koloniyada qalmasına üküm etildi. Oña 500 biñ ruble para cezası berildi ve 1 yıl qadar azatlığı sıñırlandı. Aziz Ahtemov 13 yıl sert rejimli koloniyada qalmasına üküm etildi. Oña da 500 biñ ruble para cezası berildi ve azatlığı 1 yılğa sıñırlandı.
Oktâbrniñ 2-nde Nariman Celâl ve ağa-qardaş Ahtemovlar Aqmescitteki SİZO-2-den alındı ve Rusiye apishanelerine etap etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
