Qırımtatar faali Nariman Ametovğa tintüvnen kelgen FSB hadimlerinden biri Qırım.Aqiqat frilanseri Vladislav Yesipenkonıñ davasında bar.
Söz Qırım ve Aqyar şeeri boyunca Federal telükesizlik hızmetiniñ salâhiyetlisi Anton Grişçenko aqqındadır.
Ametov, dekabrniñ 17-nde Eski Qırımda olğan öz tutulmasını tasvir ete: "Olardan biri maskasız edi - beti tomalaq, közleri açıq tüslü, taz, menden alçaq. Kendisini operativ salâhiyetli, üyken leytenant Grişçenko kibi tanıttı ve mahkemeniñ qarırını oqudı. FSB hadimleri meni terror eylemini etkenimde, gaz borusındaki diversiyada şübheli sayğanı aqında yazılğan edi. Toplanmaq, sıcaq urbalar kiymek ve olarnen ketecegimni ayttılar. Tintüv menim iştiragim ile keçirilmesi içün qalmaq istedim. Amma maña yoq, şimdi biznen keteceksiñ dediler. Men ise öz istegimde israr ettim. Grişçenko buña böyle cevaplandı: özüñ çıqmasan, sürip çıqarırmız".
Dekabrniñ 17-nde saba Rusiye quvetçileri tarafından Eski Qırımda tintüv vaqtında tutulğan qırımtatarı Nariman Ametov Rusiye FSBsiniñ hadimleri tarafından elektrik aqımınen işkencege oğratıldı.
Hatırlatamız, dekabrniñ 17-nde saba Eski Qırımda Rusiye quvetçileri qırımtatarı Nariman Ametovnıñ evini tintti. O, tutuldı, onı belli olmağan yerge alıp kettiler. Narimannıñ ömür arqadaşı Elmaz Ametova, aqayı qırımtatar faalleri Nariman Celâl ve ağa-qardaş Ahtemovlar qabaatlanğan Anğara köyünde «gaz borusındaki diversiyağa» alâqası bar olğanından şübheli sayıla, dep bildirdi. Advokatlar bu malümatnı tasdıqlamay. Soñra faaller «Ametovnıñ bulunğan yeri belli degil», dep bildirdi.
Vladislav Yesipenko davası
Vladislav Yesipenko – Azatlıq Radiosınıñ (Qırım.Aqiqat leyhası) ştattan tış jurnalisti (frilanser), içtimaiy ve ekologik meselelerni aydınlatqan, qırımlılarnıñ soravlarını çıqarğan edi. 2021 senesi martnıñ 10-nda Qırımda Rusiye FSBsiniñ hadimleri tarafından tutuldı. «Ukraina mahsus hızmetleriniñ menfaatları içün» malümat toplağanında ve maşinasında «elnen yapılğan patlayıcı cihaznı» saqlağanında qabaatlandı.
27 kün devamında Yesipenkonı mustaqil advokatlarnen körüştirmediler. Amma «Krım 24» Rusiye devlet telekanalı intervyüsını kösterdi: kanal saytında derc etilgen videoda Vladislav Yesipenko yarımadada Qırım.Aqiqat leyhası içün video çıqarğanını tasdıqlap, çıqarılğanlarnı Ukraina mahsus hızmetlerine de bergenini ayttı.
Mustaqil advokat kirsetilgen Aqmescitteki mahkeme oturışuvında Vladislav Yesipenko Rusiye mahsus hızmetleri tarafından oğratılğan işkence aqqında bildirdi. Anda Yesipenko tayin etilgen advokat Violetta Sineglazovadan vazgeçti. Mahkeme Yesipenkonı 2021 senesi mayısnıñ 11-ne qadar apiste qaldırdı.
Advokat Aleksey Ladinniñ aytqanına köre, Yesipenko mahkemede işkence aqqında aytqan soñ, Rusiye FSBsiniñ hadimleri «onı öldürirler», dep qorquzdı.
Ukraina tış istihbarat hızmeti Qırım.Aqiqatqa cevap berip, FSBniñ Vladislav Yesipenkonıñ Ukraina mahsus hızmetlerinen yapqan işbirligi aqqında "provokatsiyasını izaatlamay», dep bildirdi. Qırım Muhtar Cumhuriyetiniñ prokuraturası Qırımda Vladislav Yesipenkonıñ tutıp apiske alınmasınen bağlı cinaiy tahqiqat başlattı.
Rusiye quvetçileri Vladislav Yesipenkoğa qarşı tahqiqat tedbirleri aqqında resmiy malümat bermey.
Ukraina Tış işler nazirligi, Ukraina ombudsmanı, Avropa ve Halqara jurnalistler federatsiyası Vladislav Yesipenkonı acele azat etmege çağırdı.
Serbest Avropa Radiosı/Azatlıq Radiosınıñ prezidenti Jamie Fly Yesipenkonı acele azat etmege çağırıp, SAR/AR Qırımda tutulğan Qırım.Aqiqat frilanseri bildirgen işkencege açuvlana, dep bildirdi.
