Qırımtatar faali Nariman Ametovnıñ Rusiye Tahqiqat komitetine bergen FSB hadimleri tarafından işkencege oğrav muracaatı Yaltadaki Rusiye arbiy tahqiqat bölügine berildi. Bu aqta «Qırım birdemligi» cemaat birleşmesi Ametovnıñ malümatına esaslanıp haber etti.
«Yanvarniñ 19-nda Nariman Ametov federal telükesizlik hızmeti hadimleriniñ cinayetlerini tahqiq etmek maqsadınen Qara deñiz flotundaki Rusiye Federatsiyası Tahqiqat komitetiniñ arbiy tahqiqat idaresine yazdı. Pek müim işler tahqiqatçısı ve Tahqiqat komitetiniñ adliye podpolkovniki A.Vâtkin cevap berdi, oña köre, Ametovnıñ arizası esasında teşkerüv yapıldı, neticesinde Yaltadaki Tahqiqat komitetiniñ arbiy tahqiqat bölügine muracaat bermege qarar qabul etildi, çünki organnıñ «cinayet alâmetleri olğan areketler Bağçasaray şeeriniñ memuriy sıñırlarında yapılğanını tüşünmek içün yeterli sebepleri» bar.
Hatırlatamız, dekabrniñ 17-nde saba Eski Qırımda Rusiye quvetçileri qırımtatarı Nariman Ametovnıñ evini tintti. O, tutuldı, onı belli olmağan yerge alıp kettiler. Narimannıñ ömür arqadaşı Elmaz Ametova, aqayı qırımtatar faalleri Nariman Celâl ve ağa-qardaş Ahtemovlar qabaatlanğan Anğara köyünde «gaz borusındaki diversiyağa» alâqası bar olğanından şübheli sayıla, dep bildirdi. Advokatlar bu malümatnı tasdıqlamay. Soñra faaller «Ametovnıñ bulunğan yeri belli degil», dep bildirdi. O künü Ametov evine qayttı. Soñra FSB hadimleri tarafından elektrik aqımı vastasınen işkencege oğratıldı, dep bildirdi.
Qırım Muhtar Cumhuriyetiniñ prokuraturası Ametovğa qarşı işkence qullanılğanına dair malümat sebebinden qanun ve cenk adetleriniñ bozuluvınen (Ukraina Ceza kodeksiniñ 438-inci maddesiniñ 1-inci qısmı) bağlı cinaiy tahqiqat başlattı.
Rusiye FSBsi Nariman Ametovnıñ işkencege oğratılğanını izaatlamay.
