Qırımda ''gaz borusında diversiya davası''nda apis cezasına mahküm etilgen Qırımtar Milliy Meclisiniñ reisi muavini Nariman Celâlnıñ sağlığı fenalaşqan, hastalıqları kerginleşken.
Celâlnıñ ömür arqdaşınıñ sözlerine köre, mayısnıñ 11-nde onı Aqmescitniñ 2-nci SİZO-sına avuştırğanlar. O, eki mabüsnen karantin kamerasında tutula eken.
"Narimannıñ hastalığı, üç omurğa arası quyuldığı, mevcut şarait altında anda qalmasını zorlaştıra, oturması ve ayaqta turması onıñ içün qıyındır", - dep yazdı o.
Levizanıñ bildirgenine köre, Celâlğa yañı kamerağa ne şeylerini, ne azıq mallarını almağa izin bermegenler, kitaplarını ve vesiqalarını da tutıp alğanlar. O SİZO-da berilgen aşlarnı aşamağa mecbur.
Rusiye kontrolindeki Qırım Yuqarı mahkemesi 2022 senesi sentâbrniñ 21-nde Anğarada «gaz borusındaki diversiya davasınıñ» mabüslerini uzun apis müddetlerine üküm etti: Nariman Celâl 17 yılğa ve 700 biñ ruble para cezasına, Asan Ahtemov 15 yılğa ve 500 biñ ruble para cezasına, Aziz Ahtemov 13 yılğa ve 500 biñ para cezasına üküm etildi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
