Rusiye kontrolindeki Qırım Yuqarı mahkemesi Sohiba Burhanovanıñ Kiyev rayon mahkemesiniñ öldürilgen aqayı Nabi Rahimovnıñ naaşını bermemek qararına qarşı istinaf şikâyetini red etti.
Bu aqta «Qırım birdemligi» cemaat birleşmesi advokat Siyar Paniçniñ malümatına esaslanıp haber ete.
«Olğan malümatımızğa köre, bir terror aktsiyası olmadı. Rahimov yaşağan yerinde operativ-qıdıruv tedbirleri vaqtında öldürildi. Başqa bir delilni Kiyev rayon mahkemesinde tahqiqatçı köstermedi», – dep bildirdi Paniç.
Daa evel berilgen malümatqa köre, Qırımdaki Rusiye Tahqiqat komitetiniñ idaresi Rusiye FSBsiniñ hadimleri tarafından öldürilgen Özbekistan vatandaşı Nabi Rahimovnıñ naaşını defin etilmesi içün bermedi.
Mayısnıñ 11-nde saba faaller Qırımda İçki rayonınıñ Yanış Taqıl (Zavetnoye) köyünde Ayub Rahimovnıñ evinde keçirilgen tintüv aqqında bildirdi. Qırım Muhtar Cumhuriyetiniñ prokuraturası cinaiy tahqiqat başlattı.
Daa soñra «Qırım birdemligi» cemaat birleşmesi Aqmescit civarındaki Dubki köyünde daa bir tintüv başlandı, dep bildirdi. Anda İçki rayonı Yanış Taqıl (Zavetnoye) köyündeki evinde tahqiqat tedbirleri keçirilgen Ayub Rahimov buluna, dep tahmin etilgen edi.
Qırım ve Aqyardaki Rusiye Tahqiqat komitetiniñ idaresi «uquq qoruyıcı organları hadimleriniñ ayatına qast etkeninden» şübheli sayılğan 49 yaşında Aqmescit sakinine qarşı cinaiy dava açıldı, dep bildirdi. Müessise, erkek «operativ vazifede» olğan FSB hadimlerine qarşı ateş açtı, dep bildirdi.
Şübheliniñ adı ve soyadı, adiseniñ tafsilâtları Tahqiqat komiteti tarafından aydınlatılmay.
Qırım Muhtar Cumhuriyeti ve Aqyar prokuraturası, Özbekistan vatandaşı Ayub (Nabi) Rahimovnıñ Aqmescit civarındaki Dubki köyünde öldürilüviniñ tafsilâtlarını bilmek içün «kerekli tedbirler» alına, dep bildirdi.
