Rusiye kontrolindeki Ermeni Bazar şeer mahkemesinde Qırımda ğıyabiy şekilde mahkeme etilgen qırımtatar halqınıñ milliy lideri Mustafa Cemilevniñ davası boyunca oturışuvda avgustnıñ 27-nde qabaatlav toplağan deliller baqılacaq edi, faqat olarnı mahkemege bermediler, dep bildirdi Cemilevniñ advokatı Nikolay Polozov.
Advokatnıñ aytqanına köre, mahkeme oturışuvı sentâbrniñ 15-ne qaldırıldı, dep haber ete «Qırım birdemligi» cemaat birleşmesi.
«Mahkeme qanaatlendirgen imaye tarafınıñ muracaatına köre, bugün cinaiy davada olğan delillerni tedqiq etecek edik: Simonov karabini, oña uyğun dört patron ve bir gilza. Mahkeme Krasnodar ülkesiniñ qararınen eşyalar saqlanğan Qırım Cumhuriyetindeki İç işler nazirligine muracaat etken edi, lâkin mahkeme oturışuvında belli oldı ki, Qırım Cumhuriyetindeki İç işler nazirligi azır degil ve mahkemege tek delillerni degil, bu delillerniñ bulunğan yerinen bağlı muracaat cevabını da bermedi», – dep ayttı advokat.
Polozovnıñ qayd etkenine köre, imaye tarafı Qırımdaki Rusiye İç işler nazirliginiñ esas yolbaşçısı Sergey Abisovnıñ telefon nomerini mahkemege bergen edi, oña bir sıra celpname yollanıldı, lâkin o, olarnı almadı, şunıñ içün, advokatnıñ aytqanına köre, mahkeme Abisovnı mahkemege zorlap ketirip olamay.
Advokat, mahkeme oturışuvı açıq olğanına baqmadan, mahkeme Rusiye kütleviy haber vastalarından biriniñ vekiline fotoresim ve video çıqarmağa izin bermedi, bu «aşkârlıq printsipini boza», dep qoştı.
Avgustnıñ 5-nde mahkeme Qırımnıñ Rusiye iç işler nazirliginiñ sabıq yolbaşçısı Sergey Abisovnı (2014-2018) Qırımda ğıyabiy şekilde mahküm etilgen qırımtatar halqınıñ milliy lideri Mustafa Cemilevniñ davası boyunca sorğuğa çekmek içün tekrar celpname yollaycaq ola, dep bildirdi.
Qırımdaki Rusiye Tahqiqat komitetiniñ idaresi 2020 senesi aprelniñ 13-nde Mustafa Cemilevniñ qabaatlavını Rusiye Ceza kodeksiniñ üç maddesine istinaden aydınlattı: «Rusiyege kirişi yasaqlanğan çetel vatandaşınıñ bir gruppa insanlarnen evelden añlaşıp, Rusiye devlet sıñırını keçüv (Rusiye CK 322-nci maddesiniñ 3-ünci qısmı); nariye silâsını diqqatsız saqlav, onıñ başqa insan tarafından qullanılması ve ağır aqibetlerge yol açması (Rusiye CK 224-ünci maddesi); silânı qanunsız alıp saqlav (Rusiye CK 222-nci maddesiniñ 1-inci qısmı)».
Qırımtatar halqınıñ milliy lideri Mustafa Cemilevniñ davası boyunca martnıñ 5-nde olıp keçken mahkeme oturışuvında imaye tarafı dava malümatlarında bozuvlarnı qayd etti. Advokat Nikolay Polozovnıñ bildirgenine köre, bozuvlar tahqiqatçı azırlağan malümatnen bağlı edi.
Mahkeme oturışuvında belli olğanına köre, Cemilevniñ Qırımğa kiriş yasağı 15 yılğa – 2034 senesi martnıñ 5-ne qadar uzatıldı.
Mustafa Cemilev
Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.
Mustafa Cemilev 1991 senesi Qırımğa qaytıp oldı.
III-IX çağırılış Ukraina Yuqarı Radasınıñ halq deputatı ola.
Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.
2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.
