Ermeni Bazarda Qırımda ğıyabiy şekilde mahküm etilgen qırımtatarlarnıñ milliy lideri Mustafa Cemilevniñ davası boyunca şeer mahkemesiniñ oturışuvı bitken soñ Rusiye polisiniñ hadimleri «Qırım birdemligi» cemaat birleşmesiniñ hadimine advokat Nikolay Polozovnıñ tefsirini videoğa çıqarmağa yasaqladı.
Qırım.Aqiqat mühbiri bildirgenine köre, Rusiye quvetçileri yasaq şeerde keçirilgen «terrorğa qarşı tedbirlernen» bağlı, dep ayttı.
«Uzun bir müddet içinde ilk sefer quvet qurulışlarınıñ ciddiy diqqatını kördik. Ermeni Baza şeeriniñ (polis – QA) yolbaşçısı Anatoliy Timofeyeviç Muravlev polis, patrul ve ekstremizm ile küreş merkeziniñ hadimlerinen (Rusiye kontrolindeki – QA) Ermeni Bazar şeer mahkemesine kelip, bugün Ermeni Bazarda terror ile küreş tedbirlerimi, sıñır talimlerimi, başqa bir şey sebebindenmi video çıqarmağa olmay, dep bildirdi. O, (Muravlev – QA) bir vesiqa berip olamadı», – dep bildirdi Polozov.
Qırım.Aqiqat mühbiriniñ bildirgenine köre, Muravlev Polozovğa şeadetnamesini kösterdi, amma terror ile küreş tedbirleri keçirilgenine dair vesiqanı köstermeyip, onıñ sıñırlı erişimi bar, dep ayttı.
Rusiye polisi bu adise aqqında resmiy şekilde bildirmedi.
Avgustnıñ 5-nde mahkeme Qırımnıñ Rusiye iç işler nazirliginiñ sabıq yolbaşçısı Sergey Abisovnı (2014-2018) Qırımda ğıyabiy şekilde mahküm etilgen qırımtatar halqınıñ milliy lideri Mustafa Cemilevniñ davası boyunca sorğuğa çekmek içün tekrar celpname yollaycaq ola, dep bildirdi.
Qırımdaki Rusiye Tahqiqat komitetiniñ idaresi 2020 senesi aprelniñ 13-nde Mustafa Cemilevniñ qabaatlavını Rusiye Ceza kodeksiniñ üç maddesine istinaden aydınlattı: «Rusiyege kirişi yasaqlanğan çetel vatandaşınıñ bir gruppa insanlarnen evelden añlaşıp, Rusiye devlet sıñırını keçüv (Rusiye CK 322-nci maddesiniñ 3-ünci qısmı); nariye silâsını diqqatsız saqlav, onıñ başqa insan tarafından qullanılması ve ağır aqibetlerge yol açması (Rusiye CK 224-ünci maddesi); silânı qanunsız alıp saqlav (Rusiye CK 222-nci maddesiniñ 1-inci qısmı)».
Qırımtatar halqınıñ milliy lideri Mustafa Cemilevniñ davası boyunca martnıñ 5-nde olıp keçken mahkeme oturışuvında imaye tarafı dava malümatlarında bozuvlarnı qayd etti. Advokat Nikolay Polozovnıñ bildirgenine köre, bozuvlar tahqiqatçı azırlağan malümatnen bağlı edi. Mahkeme oturışuvında belli olğanına köre, Cemilevniñ Qırımğa kiriş yasağı 15 yılğa – 2034 senesi martnıñ 5-ne qadar uzatıldı.
Mustafa Cemilev
Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.
Mustafa Cemilev 1991 senesi Qırımğa qaytıp oldı.
III-IX çağırılış Ukraina Yuqarı Radasınıñ halq deputatı ola.
Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.
2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.
