Rusiye kontrolindeki Ermeni Bazar şeer mahkemesi «Mustafa Cemilev davasınıñ» oturışuvını martnıñ 1-ne qaldırdı. Bu aqta advokat Nikolay Polozov bildirdi.
«Qabaatlav deñişkeni içün mahkeme oturışuvnı martnıñ 1-ne qaldırdı. Saat 9:30-da başlanacaq», – dep yazdı uquqçı Facebookta.
Onıñ qayd etkenine köre, bugünki oturışuvda ekspert-ballist Stanislav Çumakov sorğuğa çekildi, o, mahkeme tayin etken 1943 senesiniñ 7.62x39 kalibrli dört patronnıñ qoşma ballistik ekspertizasını keçirdi. O, ekspertizasında qayd etilgen hulâsalarını tasdıqladı.
«Ekspert sorğusından soñ devlet qabaatlayıcısı Rusiye Federatsiyası FSB sıñır idaresiniñ prokuraturanıñ muracaatına bergen cevabını qoşmağa rica etti, andaki devlet sıñırı koordinatları qabaatlayıcı qararda qayd etilgen koordinatlardan farqlıdır. Mahkeme işbu vesiqanı ilâve etken soñ, prokuror qabaatnı deñiştirmek içün teneffüs ilân etti. Teneffüsten soñ prokuror Mustafa Cemilevge qarşı qabaatlavnı deñiştirmege rica etti. Qabaatlavnıñ bütün maddeleri, devlet sıñırı koordinatlarından ğayrı, deñişmedi. İmaye bu muracaatqa qarşı çıqtı, çünki Rusiye Federatsiyası Ükümetiniñ qararınen devlet sıñırı keçken yerni belgilemek vekâleti olğan yekâne organ Federal geodeziya ve haritacılıq agentligi ola, lâkin prokuratura anda öyle de muracaat etmedi», – dep haber etti Polozov.
Qırımdaki Rusiye Tahqiqat komitetiniñ idaresi 2020 senesi aprelniñ 13-nde Mustafa Cemilevniñ qabaatlavını Rusiye Ceza kodeksiniñ üç maddesine istinaden aydınlattı: «Rusiyege kirişi yasaqlanğan çetel vatandaşınıñ bir gruppa insanlarnen evelden añlaşıp, Rusiye devlet sıñırını keçüv (Rusiye CK 322-nci maddesiniñ 3-ünci qısmı); nariye silâsını diqqatsız saqlav, onıñ başqa insan tarafından qullanılması ve ağır aqibetlerge yol açması (Rusiye CK 224-ünci maddesi); silânı qanunsız alıp saqlav (Rusiye CK 222-nci maddesiniñ 1-inci qısmı)».
Qırımtatar halqınıñ milliy lideri Mustafa Cemilevniñ davası boyunca martnıñ 5-nde olıp keçken mahkeme oturışuvında imaye tarafı dava malümatlarında bozuvlarnı qayd etti. Advokat Nikolay Polozovnıñ bildirgenine köre, bozuvlar tahqiqatçı azırlağan malümatnen bağlı edi.
Mahkeme oturışuvında belli olğanına köre, Cemilevniñ Qırımğa kiriş yasağı 15 yılğa – 2034 senesi martnıñ 5-ne qadar uzatıldı.
Mustafa Cemilev
Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.
Mustafa Cemilev 1991 senesi Qırımğa qaytıp oldı.
III-IX çağırılış Ukraina Yuqarı Radasınıñ halq deputatı ola.
Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.
2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.
