Rusiye kontrolindeki Ermeni Bazar şeer mahkemesi aprelniñ 14-nde «Mustafa Cemilev davasınıñ» video delillerini tedqiq etmege devam etti. Advokat Nikolay Polozovnıñ Qırım.Aqiqatqa bildirgenine köre, qabaatlav bergen video qaydlarında o vaqıt Qırımnıñ Rusiye ükümeti reisiniñ muavini vazifelerini eda etken Lenur İslâmov ve şimdi Rusiye Devlet dumasınıñ deputatı olğan, daa evel ise Qırımnıñ Rusiye ükümetinde baş nazir muavini olğan Mihail Şeremet bar.
«Biz bir qaç memurnı kördik, hususan – Mihail Şeremetni ve Lenur İslâmovnı, olar muzakereler keçirgen edi, altı yıl devamında tahqiqat olarnı şaat olaraq ne içün sorğuğa çekmedi, bilmeymiz», – dep tarif etti Polozov. O, Cemilev 2014 senesi mayısnıñ 3-nde Qırım ve Herson vilâyetiniñ memuriy sıñırını qanunsız alda keçkeninde qabaatlana, dep hatırlattı.
Advokatnıñ bildirgenine köre, videolarda Mustafa Cemilevniñ «bir yerde», pasport kontroli yapılacaq vagonçıqlar yanında turğanı körüne, lâkin sıñır hızmetiniñ hadimleri anda yoq edi. Devlet sıñırı işaretleri de körünmey.
Mihail Şeremet ve Lenur İslâmov bu malümatnı izaatlamaylar.
Qırımdaki Rusiye Tahqiqat komitetiniñ idaresi 2020 senesi aprelniñ 13-nde Mustafa Cemilevniñ qabaatlavını Rusiye Ceza kodeksiniñ üç maddesine istinaden aydınlattı: «Rusiyege kirişi yasaqlanğan çetel vatandaşınıñ bir gruppa insanlarnen evelden añlaşıp, Rusiye devlet sıñırını keçüv (Rusiye CK 322-nci maddesiniñ 3-ünci qısmı); nariye silâsını diqqatsız saqlav, onıñ başqa insan tarafından qullanılması ve ağır aqibetlerge yol açması (Rusiye CK 224-ünci maddesi); silânı qanunsız alıp saqlav (Rusiye CK 222-nci maddesiniñ 1-inci qısmı)».
Hatırlatamız, qırımtatar halqınıñ milliy lideri Mustafa Cemilevniñ davası boyunca martnıñ 5-nde olıp keçken mahkeme oturışuvında imaye tarafı dava malümatlarında bozuvlarnı qayd etti. Advokat Nikolay Polozovnıñ bildirgenine köre, bozuvlar tahqiqatçı azırlağan malümatnen bağlı edi. Mahkeme oturışuvında belli olğanına köre, Cemilevniñ Qırımğa kiriş yasağı 15 yılğa – 2034 senesi martnıñ 5-ne qadar uzatıldı.
Mustafa Cemilev
Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.
Mustafa Cemilev 1991 senesi Qırımğa qaytıp oldı.
III-IX çağırılış Ukraina Yuqarı Radasınıñ halq deputatı ola.
Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.
2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.
