Mustafa Cemilev: "Abramoviçke deyim: menim ofisime kirmeñiz ile bağlı oğursızlıq oldı"

Ukrayina millet vekili, Qırımtatar halqınıñ milliy lideri Mustafa Cemilev Qırım.Aqiqatqa 2022 senesi martnıñ 3-nde Kıyivde Rusiye milliarderi Roman Abramoviç ile olıp keçken körüşüv aqqında aytıp berdi. Kerçekten de Ukrayina ve Rusiyeden aytışuv gruppasınıñ iştirakçilerini bellisiz madde ile zeerlemek ıntıluvınıñ olıp-olmaması ve Abramoviçninh aytışmalar ve Rusiyeniñ Ukrayinağa qarşı cenki aqqında neler aytqanını Qırım.Aqiqat azırlağan materialda oquñız.

Martnıñ 28-nde Wall Street Journal gazetiniñ jurnalistleri Roman Abramoviç ve Ukrayina delegatsiyasınıñ eki azasını, olarnıñ arasında Ukrayina millet vekili, qırımtatar Rustem Ümerovnı bellisiz madde ile zeerlemege tırışqanları aqqında yazdı. Gazetniñ malümatına köre, olarnıñ közlerinde qızarıntı, daimiy ve ağırtıcı yaş aqması, bet ve ellerde teri köçmesi bar edi. Bu, martnıñ 3-nde Kıyivde yüz berdi.

Mustafa Cemilev bu malümatnı Qırım.Aqiqatqa tasdıqladı ve körüşüv onıñ Kıyivdeki ofisinde olıp keçkenini bildirdi. Anda Abramoviç yardımcısı ve Rustem Ümerov ile kelgen. Cemilevniñ sözlerine köre, ziyaret aqqında, belki de, Ukrayina mahsus hızmetleri ve tar daire haberdar edi.

"Martnıñ 3-nde o (Abramoviç – muar.) Ukrayina millet vekili ve halqara aytışuv gruppasınıñ azası Rustem Ümerov ve yardımcısı Denis ile beraber Kıyivge keldi. Ve olar menim Kıyivdeki ofisime kirdiler. Ve birden özüni yaramay is etip başladılar: közyaş, sızlav, baş ağrısı. Bir eksik bar olğanını añladıq ve tez-tez Ankarağa kettik. Anda, bu kerçekten de himiyeviy zeerlenüv olğanını ayttılar, angi madden olğanı daa belli degil. Abramoviçniñ mında (Kıyivge –muar.) kelecegi aqqında kimse bilmey edi, deseñ olacaq. Er şey gizli edi", – dedi Mustafa Cemilev.

Muarririyet zeerleme ıntıluvına dair Roman Abramoviç ve Rustem Ümerovnıñ izaatını almağa tırıştı. Bu materialda añıp keçilgen er bir siyasetçige söz bermege azırmız.

Cemilevniñ sözlerine köre, yüz bergen vaqiadan soñ Ukrayina mahsus hızmetleri ofiste teşkerüv keçirgenler, nümüneler alğanlar ve tek bundan soñ Cemilev anda çalışıp olğan.

Mustafa Cemilev, bellisiz şahıslarnıñ Rustem Ümerovnı zeerlemege istegenini tahmin ete, amma aynı zamanda Rusiyede Abramoviçni begenmegen adamlar olğanını da qayd ete.

"Anda eñ çoq Rustem Ümerovnı zeerlemege tırışqanlarını, amma aynı zamanda nişan Abramoviç de ola bilgenini tüşünem. Özü de, anda Moskvada çoqusı mahsus hızmetler onı begenmegenini añlay. Abramoviçke deyim: menim ofisime kirmeñiz ile bağlı oğursızlıq oldı. O külümsiredi ve "e oğursız" dedi", - dep aytıp berdi Mustafa Cemilev.

Mustafa Cemilev, rusiyeli milliarder ile qonuşmasınıñ tafsilâtını aytıp berdi. Ukrayina millet vekili Roman Abramoviçniñ Rusiyeniñ keleceginden kerçekten raatsız olğanı, lâkin onıñ şahsiy menfaatlarını da istisna etmemek kerek olğanı aqqında fikrini bildirdi.

"Abramoviçniñ casus olğanı şübelidir. Onen laf etken soñ körüne ki, öz menfaatları bar, amma da çoq memleketiniñ kelecegi içün qorqqa. O maña böyle dedi: eger bu Ukrayina meselesinden çıqmasaq, memleketimiz dağılır", - dep qayd etti Cemilev.

Mustafa Cemilev, Roman Abramoviç Rusiyeden olğan aytışuv gruppasınıñ azası olmağanını, bu gruppada mesleatçı kibi iştirak etkenini qayd etti. Abramoviç Rusiye prezidenti Vladimir Putin ile şahsen laf etkeni içün millet vekili onı eñ nufuzlı şahıslardan biri kibi saya.

"Men oña añlatmağa tırıştım. Deyim, siz bunı Putinge aytıñız - bizni Rusiyeniñ duşmanı kibi saymaq adet olsa da, aslında böyle degil. Oña amanlıq tileymiz, amma sevgenimizden degil. Elbette, 2014 senesi yüz bergen vaqialardan ve hususan da 48 kün devam etken canavarlıqlardan soñ Rusiyeni sevgenimiz aqqında aytmağa aqaret olur edi. Amma pragmatik sebeplerge köre, qomşumızda amanlıq olsa, demek ondan problemalar azdır. Halqara uquqqa tamamınen riayet etip başlağanıñızda normal devletler ile bir sırağa turıp olursız ve problemalarıñız da olmaz. Amma bu olmadan sanktsiyalar lâğu etilmez. Kimse siznen selâmlaşmaz, qol uzatmaz. Abramoviç dey: men bunı pek yahşı añlayım, amma anavı, Kremlde oturğanğa bunı añlatmağa qıyındır", - dep aytıp berdi Cemilev.

Mustafa Cemilev, rusiyeli oligarhnıñ Ukrayina ve Rusiye arasında aytışuv esnasında iştirak etmek ile angi maqsatlarnı közetkeni ile bağlı fikirlerinen palaştı.

"Oña daa çoq işanç. Belki de bu sebepten Putin onı yolladı. Aynı zamanda, o, cenk Rusiyege kerçekten zarar ketirgenini ve onı başlamağa kerek olmağanını tüşüngenlerden biridir. Elbette öz menfaatları da bar. O dey: "Buña, Londrada oquğan qızımnıñ ne alâqası bar. Rusiyeden olğanı içün sınıfdaşları üstüne yeşil ilâc töktiler. Mında er şey menden alındı". Belli onıñ da şahsiy motivi bar. Belki de, sanktsiyalarnıñ lâğu etilmesini istey. Amma şimdi başqa motivi olğanını tüşünem. O kerçekten memleketini qayğıra. Aqılğa yatqan adımlar yapmasaq, er şey mahv olacaq, dey".

Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.

Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.

Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.

Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.

Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net​. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.