Moskvanıñ merkezinde iyülniñ 18-nde aqşam «Strategiya-18» teşebbüsiniñ faalleri qırımtatarlarğa qoltutmaq içün bir kişilik narazılıq aktsiyalarını keçirdi. Olar akimiyetten Rusiye apishanelerinde tutulğan bütün ukrainalı siyasiy mabüslerni azat etmesini talap etti.
Bu aqta teşebbüs iştirakçisi Vera Lavreşina Qırım.Aqiqatqa tarif etti.
«Qırımtatar halqınıñ Qızıl meydandaki aktsiyasından alâ daa tesir altında bulunam… Tverskayağa Moskvada qırımtatar faallerinde olğan şiarlarnen çıqtıq, qabaatsızlarnıñ azat etilüvini talap etemiz… İnsanlar baqa, soray, bir şeyler tüşüneler. Er kesniñ ömrü şeker degil. Bugün yanımızda eki yañı narazılıqçı bar edi, qaraman halq qırımtatarlarğa qoltutmağa istediler. Olarnıñ sayesinde bu yüzsüz rejim daa tez yıqılır. Şübhemiz yoq», – dedi Lavreşina.
Faallerniñ qollarında «Musulmanlar terrorist degil», «Qırım işğali – Rusiyeniñ masqarılığıdır», «Balalarımız – terrorist degil» yazuvlı şiarları bar edi.
Aynı vaqıtta Sankt-Peterburgda Qırımdaki repressiyalarğa qarşı bir kişilik narazılıq aktsiyaları keçirildi.
Sankt-Peterburg ve Moskvada yaşağan Rusiye faalleri «Strategiya-18» müddetsiz aktsiyasına birleşken edi. Bu ad 1944 senesi mayısnıñ 18-nde olğan qırımtatar sürgünliginiñ künü ile bağlıdır. Er aynıñ 18-nde faaller soqaqlarğa çıqıp, işğal etilgen Qırım vaziyetini, insan aqları bozulğanını tarif eteler.
Aq qorçalayıcılarnıñ malümatına köre, tahminen 60 Ukraina vatandaşı Rusiyede ve işğal etilgen Qırımda siyasiy sebeplerden azatlıqtan marum etildi. Ukraina Tış işler nazirligi, Rusiyege 300 kerege yaqın narazılıq bildirip, anda olğan ukrainalılarnı azat etmesini talap etken edi.
