Sankt-Peterburgnıñ Nevskiy caddesinde «Strategiya-18» Rusiye teşebbüsiniñ faalleri Qırımdaki repressiyalarğa qarşı bir kişilik narazılıq aktsiyalarını keçire. Bu aqta teşebbüsniñ Facebook saifesinde haber etile.
Faallerden biri Olga Smirnovanıñ aytqanına köre, teşebbüs iştirakçileri yarımadada qırımtatarlarnıñ taqip etilüvini toqtatmağa, Rusiye apishanelerinde tutulğan ukrainalı siyasiy mabüslerni azat etmege, Qırımda repressiyalar kerçekleştirgen Rusiye akimiyeti vekillerini mesüliyetke çekmege talap ete.
Faaller qırımtatar bayraqlarını ve «Qırımda repressiyalarnı toqtatıñız» yazuvlı şiarlarını tuta.
Sankt-Peterburg ve Moskvada yaşağan Rusiye faalleri «Strategiya-18» müddetsiz aktsiyasına birleşken edi. Bu ad 1944 senesi mayısnıñ 18-nde olğan qırımtatar sürgünliginiñ künü ile bağlıdır. Er aynıñ 18-nde faaller soqaqlarğa çıqıp, işğal etilgen Qırım vaziyetini, insan aqları bozulğanını tarif eteler.
Aq qorçalayıcılarnıñ malümatına köre, tahminen 60 Ukraina vatandaşı Rusiyede ve işğal etilgen Qırımda siyasiy sebeplerden azatlıqtan marum etildi. Ukraina Tış işler nazirligi, Rusiyege 300 kerege yaqın narazılıq bildirip, anda olğan ukrainalılarnı azat etmesini talap etken edi.
