İyülniñ 11-nde Rusiye Yuqarı mahkemesi ögünde tutulğan 18 qırımtatar faali Moskvada umumen 360 biñ rublelik cöreme aldı. Bu aqta faal ve aq qorçalayıcı Lutfiye Zudiyeva Qırım.Aqiqat mühbirine bildirdi.
«Saba saat 11-den başlap kündüz saat 4-ke qadar qadı 18 qırımtatar faaliniñ memuriy davalarını baqtı. Qayd etmeli ki, insanlarnıñ Qırımdan Moskvağa, o qadar mesafege baqmadan kelmesi, qırımtatarlarğa qarşı daimiy repressiyalarğa cemaat cevabı oldı. O künü (iyülniñ 11-nde) insanlar cemaat nizamını bozmadı ve politsiyanıñ ilk talabınen aktsiyalarını bitirdi. Bu delillerni baqmağan qadı bu madde boyunca berilgen eñ büyük cezanı sayladı. Neticede cöremeniñ umumiy miqdarı 360 biñ ruble oldı», – dedi Zudiyeva.
Onıñ aytqanına köre, bu simvolik bir miqdar, çünki bu para bölünse, er bir qırımtatarı semetdeşlerine qarşı yapılğan repressiyalarğa razı olmağanı içün 1 ruble para cezasını alır.
«Bugünki künniñ neticelerine baqılsa, 300 biñden ziyade para aqqında laf kete. Cedvelge aluv malümatına inansaq, bu Qırımda yaşağan qırımtatarlarnıñ sayısıdır. Bu para halq arasında bölünse, er bir qırımtatarı semetdeşleri terrorist ve ekstremist olğanına razı olmasa, bir ruble cöreme alır. Bu para cezasını halq arasında bölmek – bizim vazifemiz ve apiske alınğan qırımtatarlarğa birdemlik köstermektir. Onı o künü telükesizligini sarf etken insanlarnıñ omuzlarına qaldırıp olamaymız», – dedi aq qorçalayıcı.
Moskvanıñ Taganskiy rayon mahkemesiniñ qadısı Yuliya Smolina iyülniñ 29-nda Bağçasaraydaki birinci «Hizb ut-Tahrir davasınıñ» mabüslerine qoltutmaq içün iyülniñ 11-nde Rusiye Yuqarı mahkemesi ögünde toplaşqan 18 qırımlığa 20 biñ ruble miqdarında para cezasını berdi. Tutulğanlar umumen 360 biñ rublelik para cezalarını aldı.
20 biñ rublelik para cezası Rustem Tairov, Edem Abdullayev, Aleksandr Gavrikov, Kâzim Useinov, Nariman İbraimov, Zenur Appazov, Eleonor İzmailov, Rustem Celâlov, Osman Hoş, İzzet Sayfulin, Marlen Cemilev, Remzi Beytullayev, Refat Kamilov, Osman Abdurazakov, Marlen Ahayev, Edem Aliyev, Emin Rustemov, Amethan Umerovğa berildi.
Moskvada iyülniñ 11-nde Rusiye politsiyası Bağçasaraydaki birinci «Hizb ut-Tahrir davasınıñ» mabüslerine qoltutmaq içün Rusiye Yuqarı mahkemesiniñ binasına kelgen 45 insannı tuttı. Faallerniñ qollarında yazuvlı şiarlar bar edi: «Qırımda milliy ve diniy sebeplerden repressiyalarnı toqtatıñız», «Qırımda «terrorizm» ile küreş – farqlı fikirlernen küreştir», «Bizim balalarımız terrorist degil» ve ilâhre.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
