Link açıqlığı

Saatnıñ esas haberi

Moskva mahkemesi Rusiye Yuqarı mahkemesi ögünde tutulğan 18 qırımlığa para cezasını berdi


Rusiye Yuqarı mahkemesi ögünde Bağçasaraydaki birinci «Hizb ut-Tahrir davası» boyunca mahküm etilgen qırımtatarlarğa qoltutuv aktsiyası. Moskva, 2019 senesi iyülniñ 11-i
Rusiye Yuqarı mahkemesi ögünde Bağçasaraydaki birinci «Hizb ut-Tahrir davası» boyunca mahküm etilgen qırımtatarlarğa qoltutuv aktsiyası. Moskva, 2019 senesi iyülniñ 11-i

Moskvanıñ Taganskiy rayon mahkemesiniñ qadısı Yuliya Smolina iyülniñ 29-nda Bağçasaraydaki birinci «Hizb ut-Tahrir davasınıñ» mabüslerine qoltutmaq içün iyülniñ 11-nde Rusiye Yuqarı mahkemesi ögünde toplaşqan 18 qırımlığa 20 biñ ruble miqdarında para cezasını berdi. Bu aqta Qırım.Aqiqat mühbiri haber ete.

Mahkeme oturışuvlarında imaye qabaatlav tarafını çağırmağa ve politsiya hadimlerinden şaatlarnı sorğuğa çekmek içün davet etmege talap etti. Mahkeme, bu muracaatlarnı red etti.

Mahküm etilgen qırımlılar oturışuvğa kelmedi, amma yaşçik şekilde bildirgenler.

Advokatlar izni alınmağan toplaşuv 1 daqqa ve 15 saniye devam etkenine ve toplaşqanlar politsiyanıñ talaplarına riayet etip, timsallerni alıp saqlağanına ve, olarnıñ fikirince, uquq bozuvı yañlış tasnif etilgenine mahkemeniñ diqqatını celp etti.

İmayeniñ qayd etkenine köre, celp etilgen kişi – Aleksandr Gavrikov – qomşu soqaqta tutulğan edi.

«Böylece, onıñ areketlerinde cinayet alâmetleri yoq", – dep ayttı advokat Konstantin Andreyev.

Bundan ğayrı, advokat Olga Gnezdilova oturışuv vaqtında qadı işbu madde boyunca berile bilgen eñ büyük cezanı tayin ete, dep qayd ete.

Gnezdilova ve diger advokatlarnıñ aytqanına köre, bütün qararlar temyiz etilecek.

Qırım.Aqiqat mühbiriniñ malümatına köre, qadı mesleat odasında olğanda anda ara-sıra mahkeme kâtibi, memuriyetniñ cemaat bağları hadimi, kantselâriya hadimi ve kimligi belli olmağan er adam kire edi.

20 biñ rublelik para cezası Rustem Tairov, Edem Abdullayev, Aleksandr Gavrikov, Kâzim Useinov, Nariman İbraimov, Zenur Appazov, Eleonor İzmailov, Rustem Celâlov, Osman Hoş, İzzet Sayfulin, Marlen Cemilev, Remzi Beytullayev, Refat Kamilov, Osman Abdurazakov, Marlen Ahayev, Edem Aliyev, Emin Rustemov, Amethan Umerovğa berildi.

Moskvada iyülniñ 10-11-nde Rusiye politsiyası Bağçasaraydaki birinci «Hizb ut-Tahrir davasınıñ» mabüslerine qoltutmaq içün Rusiye Yuqarı mahkemesiniñ binasına kelgen 50-den ziyade insannı tuttı. Qızıl meydanda tutulğan qırımtatarlarnıñ qollarında yazuvlı şiarlar bar edi: «Qırımda milliy ve diniy sebeplerden repressiyalarnı toqtatıñız», «Qırımda «terrorizm» ile küreş – farqlı fikirlernen küreştir», «Bizim balalarımız terrorist degil» ve ilâhre.

«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG