Salı künü, avgustnıñ 18-nde, «Strategiya-18» faalleri Moskvada qırımtatar halqınıñ aqlarını qorumaq içün ve 26 yıl devamında memleketni idare etken Aleksandr Lukaşenkonıñ ğayrıdan saylanmasına qarşı narazılıq aktsiyaları eki aftadan berli devam etken Beyazrusiyede «Qırım stsenariyi» tekrarlanmasına qarşı bir kişilik narazılıq aktsiyalarını keçirdi.
Aktsiya iştirakçileri Rusiye apsinde yatqan ukrain ve qırımtatar faallerine qol tutuv yazuvlı şiarlarınen turıp, olarnı azat etmege çağırdı.
«Bir qaç kere aytıldı, Ukraina ve Rusiye arasında deñiştirilecek şahıslarnıñ cedvelleri endi azır, amma daa bir şey yoq, ne yazıq ki. «Deñişim fondu» ise toldurıla», – dep qayd etti faal Vera Lavreşina.
Onıñ Qırım.Aqiqatqa bildirgenine köre, bu sefer faaller tutulmadı, aktsiya raat keçti.
İyül ayında berilgen malümatqa köre, piterli faal Vladimir Şipitsın cumaertesi künü qırımtatarlarğa qol tutuv aktsiyası vaqtında tutulğan edi.
Bundan evel «Strategiya-18» Rusiye teşebbüsiniñ faalleri qırımtatarlarğa qol tutuv ve Qırımnı işğalden qurtaruv narazılıq aktsiyalarına çıqtı. Narazılıq bildirgenler Qırımda insanlar tutulğanını ve Rusiye işğali altındaki yarımadada qırımtatarlarnıñ vaziyeti aqqında yazuvlı şiarlar vastasınen hatırlattı.
Sankt-Peterburg ve Moskvada yaşağan Rusiye faalleri «Strategiya-18» müddetsiz aktsiyasına birleşken edi. Bu ad 1944 senesi mayısnıñ 18-nde olğan qırımtatar sürgünliginiñ künü ile bağlıdır. Er aynıñ 18-nde faaller soqaqlarğa çıqıp, işğal etilgen Qırım vaziyetini, insan aqları bozulğanını tarif eteler.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
