Cumaertesi künü, iyülniñ 18-nde, qırımtatarlarğa qol tutuv aktsiyası vaqtında tutulğan Piter faali Vladimir Şipitsın Leningrad vilâyetiniñ Tahqiqat komiteti idaresinden kelmek şartınen yiberildi. Bu aqta advokat Anton Yupanov Qırım.Aqiqat mühbirine bildirdi.
Onıñ aytqanına köre, Faal sorğuğa çekildi ve «zarar körgen politsiya hadiminen» yüzleştirüv yapıldı.
«Şpitsın şübheli sayıla, qabaatlanmadı, kelmek şartınen yiberildi. Vladimir Şpitsınğa qarşı cinaiy dava (Rusiye Ceza kodeksiniñ 318-inci maddesine istinaden – politsiya hadimine qarşı zorbalıq qullanıluvı – QA) açıldı, tahqiqat tedbirleri keçirile. Tahmin etmekten vazgeçem», – dedi advokat.
Vladimir Şipitsın cumaertesi künü «Strategiya-18» faalleri Sankt-Peterburgda muntazam sürette keçirgen qırımtatarlarğa qol tutuv aktsiyası vaqtında tutuldı. Şipitsın tamğalı kölmekte, «Hizb ut-Tahrir davası» mabüslerine azatlıq» yazuvlı şiarınen ve Ukraina bayrağınen tura edi.
«OVD-İnfo» malümatına köre, politsiya hadimleri altı aktsiya iştirakçisini tuttı. Şipitsın tutulğanda tüşti, bayraqnıñ plastik tayağı politsiya hadiminiñ kepkasını tüşürdi.
«Mediazona» yazğanına köre, neticede Leningrad vilâyetindeki Tahqiqat komitetiniñ Gatçin idaresiniñ tahqiqat bölügi Rusiye Ceza kodeksiniñ 318-inci maddesine istinaden cinaif dava açtı – «akimiyet vekiline qarşı zorbalıq qullanıluvı».
Berilgen malümatqa köre, Şpitsın vaqtınca tutuv izolâtorına alındı, bazar künü ise onı sorğuğa çekmek kerek ediler.
«Strategiya-18» Rusiye teşebbüsiniñ faalleri er ay keçirilgen qırımtatarlarğa qol tutuv ve Qırımnı işğalden qurtaruv narazılıq aktsiyalarına çıqtı. Aktsiyalar Moskvada iyülniñ 18-nde keçirildi. Narazılıq bildirgenler Qırımda insanlar tutulğanını ve Rusiye işğali altındaki yarımadada qırımtatarlarnıñ vaziyeti aqqında yazuvlı şiarlar vastasınen hatırlattı.
Sankt-Peterburg ve Moskvada yaşağan Rusiye faalleri «Strategiya-18» müddetsiz aktsiyasına birleşken edi. Bu ad 1944 senesi mayısnıñ 18-nde olğan qırımtatar sürgünliginiñ künü ile bağlıdır. Er aynıñ 18-nde faaller soqaqlarğa çıqıp, işğal etilgen Qırım vaziyetini, insan aqları bozulğanını tarif eteler.
