«Strategiya-18» Rusiye teşebbüsiniñ faalleri Qırım işğalini toqtatmaq talabınen ve yarımadanıñ qırımtatar ealisine qoltutuv aktsiyalarını keçirdi. Fevralniñ 18-nde aqşam Moskvanıñ merkezinde Ukraina bayrağı ve bir sıra yazuvlı şiar açıldı. Bu sefer faaller ATR qırımtatar telekanalınıñ vaziyetine de diqqat ayırdı, dep tarif etti aktsiya iştirakçisi Vera Lavreşina Qırım.Aqiqatqa.
«Biz Ukraina ile birdemlik, memleket içün qasevetlengenimizniñ timsali olaraq Ukraina bayrağını açtıq. Gençler kene öle. Putin rejimi iç bir «añlaşmağa» riayet etmey… Sevimli ATR qırımtatar telekanalına qoltutmağa isteymiz – epimiz onıñ seyircileri olamız. Kyivde eski siyasiy mabüs, radikal publitsist Boris Stomahin ATRge qoltuttı», – dep tarif etti Lavreşina.
Onıñ bildirgenine köre, Moskvadaki aktsiya raat keçti, kimse tutulmadı ve yanından keçken insanlarnen qavğa çıqmadı.
Fevralniñ 10-nda ATR qırımtatar telekanalı esapları blok etildi, dep bildirdi. Şu sebepten telekanal alıp barıcı ve musafirler olmağan yayınlarnen #SaveATR marafonını başlattı.
Ukraina medeniyet, gençlik ve sport naziri Volodımır Borodânskıy ATR qırımtatar telekanalını qapatuv telükesi bar olğanını inkâr ete. Onıñ aytqanına köre, telekanal çalışa, şu sebepten «qapanmaq üzere olğanını aytmağa kerekmey». Borodânskıynıñ aytqanına köre, 2020 senesi ATR içün 50 mln ğrn belgilendi, nazirlik 8,4 mln ğrn tahsis etti.
ATR Ukrainadan sürgün etilgen qırımtatarlar ve diger millet insanlarını yerleştirüv bücet programmasına köre 2016 senesinden berli devlet bücetinden maddiy yardım ala.
2015 senesi aprelniñ 1-nde ATR Rusiye litsenziyasını alamayıp, işğal etilgen Qırımda yayınlarını toqtattı. Yayınlar 2015 senesi iyünniñ 17-nde yañıdan başladı – telekanal Kyivge köçti.
