Moskvanıñ Meşçanskiy politsiya bölüginden memuriy protokollar tizilgen soñ iyülniñ 11-nde Moskvadaki Rusiye Yuqarı mahkemesiniñ binası ögünde tutulğan 27 qırımtatar faali yiberildi.
Bu aqta rusiyeli advokat Leonid Kozak Qırım.Aqiqat mühbirine bildirdi.
Onıñ aytqanına köre, tutulğanlarnıñ çoqusı «Hizb ut-Tahrir davası» boyunca oturışuvğa kirmek içün mahkeme binası ögünde nevbette tura edi.
«Bu insanlarnıñ bir qısmı çeşit yazısı olğan beyaz kölmekte edi. Politsiya hadimleri sebeplerini ve qabaatlarını añlatmayıp, olarnı tutmağa qarar aldı», – dedi advokat.
Faallerni tutuv ve memuriy protokollarnı tizüv sebeplerini advokat «añlayışlı» dep saymay.
«Politsiya hadimleri mahkemege nevbette turğan ve üstüne çeşit yazılar ile beyaz kölmek kiygenlerni ayırmağa istemedi. Amma kene de şiarlarnı aytmayıp, kölmek kiyilüvine qaytsaq, tutmaq içün añlaşılacaq bir sebep degil», – dep tüşüne o.
Kozaknıñ aytqanına köre, bütün memuriy protokollar «aynı şekilde tizildi».
«Politsiyanıñ versiyasına köre, 50-den ibaret bir gruppa bar edi, biri-birinden yarım metrden az mesafede tura ediler, üstlerinde yazılar ile beyaz kölmekleri bar edi, böylece cemaat nizamı içün telükeli ediler», – dep ayttı advokat.
Onıñ bildirgenine köre, tutulğan faallerniñ mahkeme oturışuvları Moskvada keçirile bile.
«Memuriy davalarnıñ yaşağan yerlerinde, yani Qırımda baqılması rica etildi. Böyle muracaatnıñ qanaatlendirüv imkânı 30%, bütün bu davalarnı Moskvanıñ Meşçanskiy rayon mahkemesi baqacaq. Bugün (iyülniñ 11-nde – QA) tutulğanlarnıñ anayasa aqqı bozulacaq», – dep qayd etti advokat.
Tış işler nazirliginiñ qayd etkenine köre, «Hizb ut-Tahrir davası» mabüsleriniñ çoq yıllıq apis cezalarını bir qaç ayğa yımşatqan Rusiye Yuqarı mahkemesiniñ qararı «ukrainalı siyasiy mabüslerge nisbeten tsinik mısqıl» ola.
«Rusiyede adaletli ve mustaqil mahkemeler olmağanını tasdıqlay. Halqara toplulıqnı Rusiyeniñ bu qanunsız areketlerini takbih etmesine ve insan aqlarınıñ bozuluvını ve qırımtatar halqınıñ taqip etilüvini toqtatmaq içün istilâcı devletke qarşı siyasiy-diplomatik ve sanktsion basqını quvetleştirmesine çağıramız, Rusiyeni ise Rusiyede qanunsız tutulğan Ukraina vatandaşlarını azat etmesine çağıramız», – dep qayd etti matbuat hızmeti.
Rusiye müesseseleri şimdilik bu malümatnı tasdıqlamay.
Ukraina Tış işler nazirligi iyülniñ 11-nde Moskvadaki Rusiye Yuqarı mahkemesinde «Hizb ut-Tahrir davası» boyunca mahküm etilgen semetdeşlerine qoltutmaq içün toplaşqan «45 qırımtatarınıñ Rusiye quvetçileri tarafından qanunsız tutulmasına qarşı» narazılıq bildirdi.
Bugün Rusiye politsiyası Moskvadaki Rusiye Yuqarı mahkemesiniñ binası ögüne Bağçasaraydaki birinci «Hizb ut-Tahrir davasınıñ» mabüslerine qoltutmağa kelgen 45 insannı tuttı. Faaller mahkeme binası ögünde «Balalarımız terrorist degil», «Qırımdaki repressiyalarnı toqtatıñız» yazuvlı şiarlarınen tura edi.
2016 senesi mayısnıñ 12-nde Bağçasarayda Rusiye telükesizlik hadimleri musulmanlar, qırımtatarlarnıñ evleri ve yerli qavehanede bir sıra tintüvler keçirdi. Neticede Bağçasaraynıñ dört sakini: Zevri Abseitov, Remzi Memetov, Rustem Abiltarov ve Enver Mamutov tutulıp, terrorizmde qabaatlandı. Olar, Rusiyede terroristik dep tanılğan «Hizb ut-Tahrir» teşkilâtında iştirak etkenlerinde şübeli dep sayıla.
2018 senesi dekabr ayında Şimaliy-Kavkaz okrugınıñ arbiy mahkemesi Enver Mamutovnı 17 yıl sert rejimli koloniyada qalmasına üküm etti, Ruslan Abiltarov, Remzi Memetov ve Zevri Abseitov 9 yıl sert rejimli koloniyada qalmasına üküm etildi.
Mabüslerden iç birisi qabaatını tanımadı. Olar cinaiy işniñ «siyasiy sebepleri bar», dep qayd etti.
İyülniñ 11-nde Rusiye Yuqarı mahkemesi dava mabüsleriniñ ükmüni deñiştirdi. Enver Mamutovğa 16 yıl ve 9 ay apis cezası berildi, Remzi Memetov, Rustem Abiltarov, Zevri Abseitovğa – 8 yıl ve 9 ay.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
