Rusiye politsiyası, birinci Bağçasaray "Hizb ut-Tahrir davası"nıñ mabüslerine qoltutmaq içün Rusiye Yuqarı Mahkemesi yanına kelgen 50-den çoq adamnı tutıp aldı. Bugün mahkeme dört qırımtatarnıñ - Zevri Abseitov, Remzi Memetov, Rustem Abiltarov ve Enver Mamutovnıñ ükmüne apellâtsiyanı baqa.
Bu aqta "Qırım birdemligi" cemiyet birleşmesi ve Rusiye uquq qoruyıcısı Aleksandra Krılenkova bildireler.
Faaller, "Balalarımız terrorist degil", "Qırımda basqını toqtatıñız" plakatlarınen mahkeme binası yanında tura edi.
Politsiya olarnı bilinmegen yerge alıp ketti.
2016 senesi mayıs 12-de Bağçasarayda Rusiye quvetçileri musulmanlar, qırımtatarlarnıñ evleri ve yerli qavehanede bir sıra tintüvler keçirdi. Neticede dört Bağçasaray sakini: Zevri Abseitov, Remzi Memetov, Rustem Abiltarov ve Enver Mamutov yaqalanıp, terrorizmde qabaatlandı. Olarnı, Rusiyede terroristik tanılğan «Hizb ut-Tahrir» teşkilâtında iştirak etkenlerinden şübheli sayalar.
2018 senesi dekabr ayında Şimaliy-Kavkaz okrugınıñ arbiy mahkemesi Enver Mamutovnı 17 yıl sert rejimli koloniyada qalmasına üküm etti, Ruslan Abiltarov, Remzi Memetov ve Zevri Abseitov 9 yıl sert rejimli koloniyada qalmasına üküm etildi.
Mabüslerden iç birisi qabaatını tanımadı. Olar cinaiy işniñ «siyasiy sebepleri bar», dep qayd etti.
