Moskovanıñ Meşçanskiy mahkemesi, iyül 11-inde Rusiye Yuqarı mahkemesi yanında tutulğan altı qırımtatar faaline cöreme ödetti. Olar anda birinci Bağçasaray "Hizb ut-Tahrir davası"nıñ iştirakçilerine qol tutmaq içün toplanğan edi.
10-an biñ rublelik para cezası Şakir Krestov, Emin Aliyev, Muhammed Kişpidirov, Seytmamut Haybulayev, Zeynur Asanov ve Nuri Abduraşıtovğa berildi. Bunı Qırım.Aqiqatqa advokat Konstantin Andreyev aytıp berdi.
"Bugün bu davalarnı büyük diqqatnen baqtılar, amma neticesi aynı edi. Amma adamlarnıñ transparantları, futbolkalarında yazıları yoq edi, olar sadece öz noqta-i nazarını köstere edi. Amma mahkemeci, episi qabaatlı, dep qarar aldı, ceza ölçüsini ise azlaştırıp oldıq. Neticede müşterilerimniñ episi 10-ar biñ rublege cöremelendi", - aytıp berdi advokat.
Andreyev aytqanına köre, imaye Avropa İnsan aqları mahkemesine baracaq ola.
"Bu mahkemeniñ qararları başqa olur, dep ümüt etmeymiz, çünki olar evelden belgilengendir. Amma Avropa İnsan aqları mahkemesinde perspektivalarımız büyüktir", - añlattı o.
Moskvanıñ Taganskiy rayon mahkemesiniñ qadısı Yuliya Smolina iyülniñ 29-nda Bağçasaraydaki birinci «Hizb ut-Tahrir davasınıñ» mabüslerine qoltutmaq içün iyülniñ 11-nde Rusiye Yuqarı mahkemesi ögünde toplaşqan 18 qırımlığa 20 biñ ruble miqdarında para cezasını berdi. Tutulğanlar umumen 360 biñ rublelik para cezalarını aldı.
Moskvada iyülniñ 11-nde Rusiye politsiyası Bağçasaraydaki birinci «Hizb ut-Tahrir davasınıñ» mabüslerine qoltutmaq içün Rusiye Yuqarı mahkemesiniñ binasına kelgen 45 insannı tuttı. Faallerniñ qollarında yazuvlı şiarlar bar edi: «Qırımda milliy ve diniy sebeplerden repressiyalarnı toqtatıñız», «Qırımda «terrorizm» ile küreş – farqlı fikirlernen küreştir», «Bizim balalarımız terrorist degil» ve ilâhre.
Uquq qorçalayıcı Lutfiye Zudiyeva, Qırımda cezalanğan faalleriniñ cöremelerini ödemek içün «Qırım marafonı» cemaat teşebbüsi çerçivesinde para toplamağa başladılar, dep bildirgen edi.
