"OVD-İnfo" uquq qoruyıcı leyha, Moskova merkezinde keçken aktsiyalarda 828 adam tutuldı, dep saydı. Moskova İçki İşler Baş İdaresiniñ resmiy malümatına köre, qararnen 600 adam tutuldı, dep bildire "Nastoyaşçeye vremâ".
Matbuatqa köre, mustaqil namzetlerniñ saylavlarğa yiberilmegeninden sebep narazılıqlar, cumaertesi künü saba Moskova merkezinde başlandı. Aktsiyağa izin berilmegeni içün, muhalifet, kezinti formatını sayladı: adamlar bulvardan bulvarğa yüre edi, olarnıñ artlarında OMON ve Rosgvardiya izley edi.
Moskova merkezinde internet ve telefon alâqası yaramay çalıştı. "Mcdonalds" ve başqa aşav yerlerinde wi-fi söndürildi. "Şokoladnitsa" hadimi aytqanına köre, bir künge wi-fini söndürmege politsiya talap etti.
Uquq qoruyıcılarnıñ malümatına köre, tutulğanlarnıñ arasında - İnsan aqları Şurasınıñ azası, İşkencelerge qarşı Komitetiniñ başı - İgor Kalâpin. Avtozaklarğa tüşkenlerniñ arasında - eñ azından altı jurnalist.
Moskovada iyül 31-inde gece iyül 27-si aktsiyanıñ eñ azından eki iştirakçisiniñ evinde tintüv keçirildi, aktsiya iştirakçileri Moskova şeer duması saylavlarına mustaqil mabuslarnıñ iştirak etmek içün yiberilmesini talap ete edi.
İyül 27-sinde Moskovada Moskova şeer duması saylavlarına mustaqil mabuslarnıñ iştirak etmek içün yiberilmesini talap etken izinsiz aktsiya keçti. Uquq qoruyıcılarğa köre, aktsiyada politsiya ve Rosgvardiya 1373 adamnıtutıp aldı, olardan 200-den ziyadesi geceni politsiya bölüklerinde keçirdi. Narazılıq iştirakçilerniñ 70-den ziyadesi yaralandı.
