“Strategiya-18” Rusiye teşebbüsiniñ faalleri Moskovada, ukrain deñizcilerni azat etmek talabınen bir kişilik piketlerni keçirdi. Bundan ğayrı, faaller ukrain rejissör, siyasiy mabüs Oleg Sentsov ve qırımlı Volodımır Baluh içün hatırlattı ve aois etilgen qırımtatarlarğa qoltutuvını bildirdi.
Narazılıq iştirakçileri Tverskaya soqağına plakatlarnen çıqtı, amma birazdan, provokatsiyalar sebebinden, narazılıq yerini deñiştirmege mecbur oldı. Bu aqta Qırım.Aqiqatqa faalci Vera Lavreşina bildirdi.
“Pikette kergin edi, artımızdan provokator yüre edi. Ahır soñu, trolleybusqa oturıp, Triumfalnaya meydanınace ketmege mecbur oldıq, anda ise avtozak keldi. Bizde endi er şey yasaq, er şeyge ilişeler. Ve daa biz qırımtatar bayrağını açtıq. Moskova “politsayları” oña “ekstremist” bayrağı” dey”, - aytıp berdi Lavreşina.
Aprelniñ 17-sinde Moskovanıñ Lefortovo mahkemesi, Qırım yalısı yanında zapt etilgen dört ukrain arbiy adamnıñ tevqif müddetini iyülniñ 24-üne qadar uzattı.
Noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».
Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
