Fevral 18-inde Moskova şeer mahkemesi, Lefortovo rayon mahkemesiniñ, cenk eseri olğan dört ukrain deñizciniñ tevqif müddetiniñ uzatılması qararına apellâtsiyanı baqacaq. Olarnıñ arasında: "Yañı Qapu"nıñ üyken matrosı Viktor Bespalçenko, "Nikopol"niñ birinci madde çavuşı Vladislav Kostışın, "Yañı Qapu"nıñ üçünci rang kapitanı Volodımır Lisovıy, "Yañı Qapu"nıñ üyken matrosı Volodımır Varimez.
Bu aqta advokat Nikolay Polozov bildirdi.
Moskovada mahkeme, Qırım yalısı yanında zapt etilgen daa dört ukrain arbiyiniñ tevfiq müddetini uzattı.
Daa evel Moskovanıñ Lefortovo rayon mahkemesi aprel 24-ünece 12 Ukraina arbiyini tevfiq astında qaldırdı.
Noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».
Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
