Moskovanıñ Lefortovo rayonınıñ mahkemesi iyün 10-unda qırımlı Yatskinniñ sıñılav tedbiriniñ uzatılmasını baqacaq. Bunı Twitterde advokat Nikolay Polozov yazdı.
"Bugün tahqiqatçı, yarın Moskovanıñ Lefortovo rayonınıñ mahkemesi Ivan Yatskinniñ sıñılav tedbiriniñ uzatılmasını baqacağını haber etti. Mahkeme oturışı saat 16:30-da başlaycaq", - yazdı Polozov.
Qırımnıñ Curçı rayonınıñ Aybar (Voykovo) köyüniñ sakini İvan Yatskin 2019 yılda oktâbr 16-sında tutuldı. Bu dekabr ayında belli oldı.
Daa evel o «Lefortovo» Moskva tahqiqat komitetinden Ukraina prezidenti Volodımır Zelenskıy ve Ukraina Yuqarı Radasınıñ insan aqları vekâletlisi Lüdmila Denisovağa mektüp yazıp, onı deñişim cedveline kirsetmege ve qorantasına maddiy yardım köstermege rica etti.
Polozov, Yatskin apiske alınğan soñ Qırımdan Moskvağa çıqarıldı, dep bildirgen edi. Onıñ aytqanına köre, Rusiye quvetçileri qırımlığa «büyük maneviy basqı» yaptı.
TASS Rusiye haber agentliginiñ bildirgenine köre, qırımlığa qarşı dava tafsilâtları «tahqiqat menfaatları içün» aydınlatılmay.
Qırım.Aqiqatnıñ Ukraina telükesizlik hızmetine yollağan muracaat cevabında İvan Yatskin UTH ile işbirligi yapmadı, dep aytıla.
